thoDi der ko hum jo kahin ruk jate to ye mumkin tha

thoḌī der ko ham jo kahīñ ruk jaate to ye mumkin thā

mil hī jaatā vo jo apne ilāqe kā ik sākin thā

kuchh bhī yaad nahīñ ab paḌtā kab pardes ko nikle the

shāyad shaam lagī thī Dhalne yā shāyad chaḌhtā din thā

ham ne jatan to laakh kiye the vaqt ne aisī karvaT lī

apnī jaḌoñ se ham juḌ paate ek yahī nā-mumkin thā

vo ik sāneha ham na jise kah paa.e ab tak guzrā jab

kaise kaise dil se chāhā thā ki na sach ho lekin thā

'talḳh' nahīñ thā sahl ye lahja jīvan bhar kī tapasyā hai

har jazbe ke ham zāmin the dard hamārā zāmin thā

thoDi der ko hum jo kahin ruk jate to ye mumkin tha

mil hi jata wo jo apne ilaqe ka ek sakin tha

kuchh bhi yaad nahin ab paDta kab pardes ko nikle the

shayad sham lagi thi Dhalne ya shayad chaDhta din tha

hum ne jatan to lakh kiye the waqt ne aisi karwaT li

apni jaDon se hum juD pate ek yahi na-mumkin tha

wo ek saneha hum na jise kah pae ab tak guzra jab

kaise kaise dil se chaha tha ki na sach ho lekin tha

'talKH' nahin tha sahl ye lahja jiwan bhar ki tapasya hai

har jazbe ke hum zamin the dard hamara zamin tha