thoDi hairan thi ghabrai thi sharmai bahut

thoḌī hairān thī ghabrā.ī thī sharmā.ī bahut

hasrat-e-dīd bujhī bujh ke bhī taḌpā.ī bahut

tum se ābād ye āñgan thā mire purkhoñ kā

suunī suunī mujhe lagtī hai ab añgnā.ī bahut

peḌ jitne the sabhī kaaT diye the ham ne

bārisheñ rukte hī in peḌoñ kī yaad aa.ī bahut

kal ufuq par na sitāre the na mahtāb na rang

thī taḳhayyul ke bhī bāzār meñ mahñgā.ī bahut

ik sanobar thā vahāñ niim vahāñ sarv vahāñ

merī miTTī meñ zarā pahle thī yakjā.ī bahut

tū agar mujh se ḳhafā ho ke gayā to kyā ġham

tujh se pahle bhī nazar aa.e haiñ harjā.ī bahut

qais mash.hūr huā ishq meñ vahdat rakh kar

varna the husn ke is duniyā meñ saudā.ī bahut

thoDi hairan thi ghabrai thi sharmai bahut

hasrat-e-did bujhi bujh ke bhi taDpai bahut

tum se aabaad ye aangan tha mere purkhon ka

suni suni mujhe lagti hai ab angnai bahut

peD jitne the sabhi kaT diye the hum ne

barishen rukte hi in peDon ki yaad aai bahut

kal ufuq par na sitare the na mahtab na rang

thi taKHayyul ke bhi bazar mein mahngai bahut

ek sanobar tha wahan nim wahan sarw wahan

meri miTTi mein zara pahle thi yakjai bahut

tu agar mujh se KHafa ho ke gaya to kya gham

tujh se pahle bhi nazar aae hain harjai bahut

qais mashhur hua ishq mein wahdat rakh kar

warna the husn ke is duniya mein saudai bahut