thoDi ruswai bhi to ishq ke izhaar mein ho

thoḌī rusvā.ī bhī to 'ishq ke iz.hār meñ ho

ho jo takrār to kuchh lutf bhī takrār meñ ho

jāñch lo nabz zarā dafn se pahle kyoñ ki

vo adākār hai shāyad kisī kirdār meñ ho

is liye log dhuāñ dekhne ko jaate haiñ

hai yaqīñ aag kā sach kal kisī aḳhbār meñ ho

kaash ye shahr mirī jeb kā rakh letā bharam

jo mujhe chāhiye kam daam meñ bāzār meñ ho

in sharīfoñ pe lagā leñ ka.ī ilzām magar

koī be-dāġh magar aap kī sarkār meñ ho

saḳht gardan bhī kaTe aur na mahsūs ho dard

ye hunar bhī to kisī haath kī talvār meñ ho

kaun aa.egā musībat meñ hifāzat ke liye

koī insāñ to bharose kā nigah-dār meñ ho

maañg le jaan bhī ulfat meñ to maiñ de dūñgā

shart hai dil ko sukūñ yaar ke dīdār meñ ho

'aib duniyā ke salīqe se batā.e sab ko

hausla itnā 'asīm' aaj ke fankār meñ ho

thoDi ruswai bhi to 'ishq ke izhaar mein ho

ho jo takrar to kuchh lutf bhi takrar mein ho

jaanch lo nabz zara dafn se pahle kyon ki

wo adakar hai shayad kisi kirdar mein ho

is liye log dhuan dekhne ko jate hain

hai yaqin aag ka sach kal kisi aKHbar mein ho

kash ye shahr meri jeb ka rakh leta bharam

jo mujhe chahiye kam dam mein bazar mein ho

in sharifon pe laga len kai ilzam magar

koi be-dagh magar aap ki sarkar mein ho

saKHt gardan bhi kaTe aur na mahsus ho dard

ye hunar bhi to kisi hath ki talwar mein ho

kaun aaega musibat mein hifazat ke liye

koi insan to bharose ka nigah-dar mein ho

mang le jaan bhi ulfat mein to main de dunga

shart hai dil ko sukun yar ke didar mein ho

'aib duniya ke saliqe se batae sab ko

hausla itna 'asim' aaj ke fankar mein ho