Thokaron ki shai parastish ki nazar tak le gae

Thokaroñ kī shai parastish kī nazar tak le ga.e

ham tire kūche ke ik patthar ko ghar tak le ga.e

chhoḌ kar jaate rahe sab kārvāñ vaale magar

rāste hī ham-safar nikle jo ghar tak le ga.e

apne hī maqtūl Thahre apne hī qātil bane

apne hī hāthoñ se ham kashtī bhañvar tak le ga.e

shaam hī tak thā sukūt-e-qabl-e-tūfāñ phir na pūchh

kaise kaise ham charāġh-e-shab sahar tak le ga.e

TūTtā kab tak na āḳhir aise taa.ir kā ġhurūr

noch kar sayyād jis ke bāl-o-par tak le ga.e

Thokaron ki shai parastish ki nazar tak le gae

hum tere kuche ke ek patthar ko ghar tak le gae

chhoD kar jate rahe sab karwan wale magar

raste hi ham-safar nikle jo ghar tak le gae

apne hi maqtul Thahre apne hi qatil bane

apne hi hathon se hum kashti bhanwar tak le gae

sham hi tak tha sukut-e-qabl-e-tufan phir na puchh

kaise kaise hum charagh-e-shab sahar tak le gae

TuTta kab tak na aaKHir aise tair ka ghurur

noch kar sayyaad jis ke baal-o-par tak le gae