tifl ne kuchh bhi nahin socha mila kar likh diya

tifl ne kuchh bhī nahīñ sochā milā kar likh diyā

zindagī aur maut ko bilkul barābar likh diyā

pahle to ik kāġhazī kashtī banā.ī aur phir

paar jaane ke liye us par muqaddar likh diyā

kal jahāñ par dil likhā thā vo jagah kamzor thī

maiñ ne dil kaaTā vahāñ se aur patthar likh diyā

mere hāthoñ meñ mashaqqat kī lakīreñ khīñch kar

jaane kyā sochā ki māthe par suḳhanvar likh diyā

jab savāl aayā ki ik mazmūn shā'ir par likheñ

to javāban aman kā shā'ir payambar likh diyā

january tā june kī mehnat mashaqqat ne janāb

vaqt se pahle hī chehre par december likh diyā

zindagī tere ta'āruf meñ bhalā aur kyā likhūñ

maiñ ne to har vāqi'a har ek manzar likh diyā

kar rahe the apnī apnī dāstāneñ sab raqam

ek jogī ne to kuuze meñ samundar likh diyā

tifl ne kuchh bhi nahin socha mila kar likh diya

zindagi aur maut ko bilkul barabar likh diya

pahle to ek kaghazi kashti banai aur phir

par jaane ke liye us par muqaddar likh diya

kal jahan par dil likha tha wo jagah kamzor thi

main ne dil kaTa wahan se aur patthar likh diya

mere hathon mein mashaqqat ki lakiren khinch kar

jaane kya socha ki mathe par suKHanwar likh diya

jab sawal aaya ki ek mazmun sha'ir par likhen

to jawaban aman ka sha'ir payambar likh diya

january ta june ki mehnat mashaqqat ne janab

waqt se pahle hi chehre par december likh diya

zindagi tere ta'aruf mein bhala aur kya likhun

main ne to har waqi'a har ek manzar likh diya

kar rahe the apni apni dastanen sab raqam

ek jogi ne to kuze mein samundar likh diya