tir-e-mizhgan ko to paikan-e-qaza kahte hain

tīr-e-mizhgāñ ko to paikān-e-qazā kahte haiñ

par nigāh-e-ġhalat-andāz ko kyā kahte haiñ

sāmne mere to dushman ko burā kahte haiñ

dushmanoñ meñ mujhe kyā jaane vo kyā kahte haiñ

jab kahā maiñ ne mujhe aap burā kahte haiñ

kis DhiTā.ī se sitamgar ne kahā kahte haiñ

chāhne vāloñ ko apne jo burā kahte haiñ

sochte bhī haiñ kabhī aap ki kyā kahte haiñ

bevafā.ī kā tirī ḳhalq gila kartī hai

aur ham haiñ ki tujhe jān-e-vafā kahte haiñ

lab hilānā bhī to ab mujh ko huā hai mushkil

merī har baat ko dushman kā gila kahte haiñ

muskurā kar mujhe dekhā ki mirī jaan ga.ī

naaz kahte haiñ ise is ko adā kahte haiñ

ġhair jo chāheñ kaheñ mujh ko magar yaad rahe

ḳhūb-rū haiñ vo jo auroñ ko burā kahte haiñ

zindagī hai vo haqīqat meñ jo kahlātī hai maut

hai vahī ain-e-baqā jis ko fanā kahte haiñ

ġhair kahtā hai burā mujh ko to kahne diije

hotī aa.ī hai ki achchhoñ ko burā kahte haiñ

ham jo kahte haiñ vo bejā hai sarāsar hai ġhalat

aur aġhyār jo kahte haiñ bajā kahte haiñ

kyā sitam hai nahīñ sunte vo fasāna merā

kahte haiñ log use hosh-rubā kahte haiñ

ghar raqīboñ ke zarūr aap ga.e the chhup kar

mujh se ye aap ke naqsh-e-kaf-e-pā kahte haiñ

aah ko merī samajhte haiñ nasīm-e-gulshan

aur nāloñ ko vo andoh-rubā kahte haiñ

mujh se kyā pūchhte ho kyā tumheñ ma.alūm nahīñ

kyoñ mujhe kushta-e-andāza-o-adā kahte haiñ

aap to jaur ke mojid haiñ jafā ke baanī

aap kyā jāneñ ki kis shai ko vafā kahte haiñ

hai junūñ un ko ye āshufta-sarī hai un kī

gesū-e-yār ko jo shām-e-balā kahte haiñ

hai samajh kā ye tirī pher butoñ ko zāhid

kab ḳhudā kahte haiñ ham shān-e-ḳhudā kahte haiñ

sunte hī niiñd na aa jaa.e to merā zimma

mere afsāne ko andoh-rubā kahte haiñ

sar uḌā dete haiñ vo teġh-e-jafā se 'nashtar'

pyaar se ham jo unheñ jān-e-vafā kahte haiñ

tir-e-mizhgan ko to paikan-e-qaza kahte hain

par nigah-e-ghalat-andaz ko kya kahte hain

samne mere to dushman ko bura kahte hain

dushmanon mein mujhe kya jaane wo kya kahte hain

jab kaha main ne mujhe aap bura kahte hain

kis DhiTai se sitamgar ne kaha kahte hain

chahne walon ko apne jo bura kahte hain

sochte bhi hain kabhi aap ki kya kahte hain

bewafai ka teri KHalq gila karti hai

aur hum hain ki tujhe jaan-e-wafa kahte hain

lab hilana bhi to ab mujh ko hua hai mushkil

meri har baat ko dushman ka gila kahte hain

muskura kar mujhe dekha ki meri jaan gai

naz kahte hain ise is ko ada kahte hain

ghair jo chahen kahen mujh ko magar yaad rahe

KHub-ru hain wo jo auron ko bura kahte hain

zindagi hai wo haqiqat mein jo kahlati hai maut

hai wahi ain-e-baqa jis ko fana kahte hain

ghair kahta hai bura mujh ko to kahne dije

hoti aai hai ki achchhon ko bura kahte hain

hum jo kahte hain wo beja hai sarasar hai ghalat

aur aghyar jo kahte hain baja kahte hain

kya sitam hai nahin sunte wo fasana mera

kahte hain log use hosh-ruba kahte hain

ghar raqibon ke zarur aap gae the chhup kar

mujh se ye aap ke naqsh-e-kaf-e-pa kahte hain

aah ko meri samajhte hain nasim-e-gulshan

aur nalon ko wo andoh-ruba kahte hain

mujh se kya puchhte ho kya tumhein malum nahin

kyon mujhe kushta-e-andaza-o-ada kahte hain

aap to jaur ke mojid hain jafa ke bani

aap kya jaanen ki kis shai ko wafa kahte hain

hai junun un ko ye aashufta-sari hai un ki

gesu-e-yar ko jo sham-e-bala kahte hain

hai samajh ka ye teri pher buton ko zahid

kab KHuda kahte hain hum shan-e-KHuda kahte hain

sunte hi nind na aa jae to mera zimma

mere afsane ko andoh-ruba kahte hain

sar uDa dete hain wo tegh-e-jafa se 'nashtar'

pyar se hum jo unhen jaan-e-wafa kahte hain