tir-e-nazar se chhid ke dil-afgar hi raha

tīr-e-nazar se chhid ke dil-afgār hī rahā

nāsūr us meñ sūrat-e-sofār hī rahā

duniyā se hai nirālī adālat hasīnoñ kī

fariyād jis ne kī vo gunahgār hī rahā

saudā.iyoñ kī bhiiḌ koī dam na kam huī

har vaqt ghar meñ yaar ke bāzār hī rahā

nargis jo us masīh kī nazroñ se gir ga.ī

achchhe na phir hue use āzār hī rahā

gulzār meñ hamesha kiye ham ne chahchahe

sayyād o bāġhbāñ ko sadā ḳhaar hī rahā

aa.ī na dekhne meñ bhī tasvīr yaar kī

ā.īna darmiyān meñ dīvār hī rahā

surme se tuur ke bhī na kuchh fā.eda huā

āñkhoñ ko intizār kā āzār hī rahā

majnūñ ne merā dāġh-e-jigar sar pe rakh liyā

ye gul vo hai jo turra-e-dastār hī rahā

kuchh bhī na mufsidoñ kī darañdāziyāñ chalīñ

ik uns mujh se un se jo thā pyaar hī rahā

bole vo merī qabr jharoke se jhāñk kar

ye shaḳhs mar ke bhī pas-e-dīvār hī rahā

mumkin na phir huī qafas-e-gor se najāt

jo is meñ phañs gayā vo giraftār hī rahā

aalam meñ husn-o-ishq kā afsāna rah gayā

yūsuf hī rah ga.e na ḳharīdār hī rahā

sayyād ko kabhī na musībat ne dī najāt

bulbul ke sabr meñ ye giraftār hī rahā

kyā jaane us ġharīb ko kis kī nazar huī

un añkhḌiyoñ kā shefta bīmār hī rahā

tū rah gayā faqat tire saudā.ī rah ga.e

yūsuf rahe na misr kā bāzār hī rahā

rāhat kisī hasīñ se bhī paa.ī na ai 'sharaf'

chāhā jise vo dar-pa.e-āzār hī rahā

tir-e-nazar se chhid ke dil-afgar hi raha

nasur us mein surat-e-sofar hi raha

duniya se hai nirali adalat hasinon ki

fariyaad jis ne ki wo gunahgar hi raha

saudaiyon ki bhiD koi dam na kam hui

har waqt ghar mein yar ke bazar hi raha

nargis jo us masih ki nazron se gir gai

achchhe na phir hue use aazar hi raha

gulzar mein hamesha kiye hum ne chahchahe

sayyaad o baghban ko sada KHar hi raha

aai na dekhne mein bhi taswir yar ki

aaina darmiyan mein diwar hi raha

surme se tur ke bhi na kuchh faeda hua

aankhon ko intizar ka aazar hi raha

majnun ne mera dagh-e-jigar sar pe rakh liya

ye gul wo hai jo turra-e-dastar hi raha

kuchh bhi na mufsidon ki darandaziyan chalin

ek uns mujh se un se jo tha pyar hi raha

bole wo meri qabr jharoke se jhank kar

ye shaKHs mar ke bhi pas-e-diwar hi raha

mumkin na phir hui qafas-e-gor se najat

jo is mein phans gaya wo giraftar hi raha

aalam mein husn-o-ishq ka afsana rah gaya

yusuf hi rah gae na KHaridar hi raha

sayyaad ko kabhi na musibat ne di najat

bulbul ke sabr mein ye giraftar hi raha

kya jaane us gharib ko kis ki nazar hui

un ankhDiyon ka shefta bimar hi raha

tu rah gaya faqat tere saudai rah gae

yusuf rahe na misr ka bazar hi raha

rahat kisi hasin se bhi pai na ai 'sharaf'

chaha jise wo dar-pae-azar hi raha