tir-e-nigah-e-naz ka ghayal jigar nahin

tīr-e-nigāh-e-nāz kā ghāyal jigar nahīñ

dil ḳhāna-e-ḳhudā hai kisī but kā ghar nahīñ

maiñ ne kahā ki maiñ fidā kyā aap par nahīñ

bole vo hañs ke haañ mujhe is kī ḳhabar nahīñ

ummīd hī nahīñ hai ki aa.eñ vo raah par

phūTā nasīb hī mirā jab raah par nahīñ

ulfat kī raah meñ to bhaTaknā zarūr hai

ye raah vo hai jis meñ koī rāhbar nahīñ

insāñ ke dil meñ dair-o-haram meñ kalīsā meñ

vo kaun ghar hai jis meñ tumhārā guzar nahīñ

ye bhī tire jamāl kā adnā jamāl hai

sūraj pe jo Thahartī kisī kī nazar nahīñ

ġham kī kaTī jo raat to rāhat kī sub.h hai

vo shaam shaam kyā hai ki jis kī sahar nahīñ

chhup-chhup ke jab dikhāte ho husn-o-adā-o-nāz

parde se phir nikālte kyoñ apnā sar nahīñ

'sanjar' likhūñ jo naama unheñ le ke jaa.e kaun

apnā to koī rāz-dāñ paiġhāmbar nahīñ

tir-e-nigah-e-naz ka ghayal jigar nahin

dil KHana-e-KHuda hai kisi but ka ghar nahin

main ne kaha ki main fida kya aap par nahin

bole wo hans ke han mujhe is ki KHabar nahin

ummid hi nahin hai ki aaen wo rah par

phuTa nasib hi mera jab rah par nahin

ulfat ki rah mein to bhaTakna zarur hai

ye rah wo hai jis mein koi rahbar nahin

insan ke dil mein dair-o-haram mein kalisa mein

wo kaun ghar hai jis mein tumhaara guzar nahin

ye bhi tere jamal ka adna jamal hai

suraj pe jo Thaharti kisi ki nazar nahin

gham ki kaTi jo raat to rahat ki subh hai

wo sham sham kya hai ki jis ki sahar nahin

chhup-chhup ke jab dikhate ho husn-o-ada-o-naz

parde se phir nikalte kyon apna sar nahin

'sanjar' likhun jo nama unhen le ke jae kaun

apna to koi raaz-dan paighambar nahin