tir ki parwaz hai mashkiza-e-dil ki taraf

tiir kī parvāz hai mashkīza-e-dil kī taraf

ho ke ghāyal phir bhī ham maa.il haiñ qātil kī taraf

go nahīñ pairāk lekin hausla baḌhne kā hai

mauj kī ik fauj saf-basta hai sāhil kī taraf

har jagah hāzir huuñ maiñ apne misālī tan ke saath

fāsle aur vaqt be-ma.anī haiñ manzil kī taraf

jaisī apnī ain hai utnī hī apnī dauḌ-dhūp

qais mahmil kī taraf ham sham-e-mahfil kī taraf

saut-e-nāqūs-o-jaras ho yā azaañ ho yā jaras

rāsta ik aur jaatā hai salāsil kī taraf

jaise be-harf-o-navā utrī hai ilhāmī kitāb

vo muḳhātab haiñ usī andāz se dil kī taraf

bāda-ḳhvāroñ meñ bhī ham 'kāvish' valī ban kar jiye

ruḳh hamārā thā tasavvuf ke masā.il kī taraf

tir ki parwaz hai mashkiza-e-dil ki taraf

ho ke ghayal phir bhi hum mail hain qatil ki taraf

go nahin pairak lekin hausla baDhne ka hai

mauj ki ek fauj saf-basta hai sahil ki taraf

har jagah hazir hun main apne misali tan ke sath

fasle aur waqt be-mani hain manzil ki taraf

jaisi apni ain hai utni hi apni dauD-dhup

qais mahmil ki taraf hum sham-e-mahfil ki taraf

saut-e-naqus-o-jaras ho ya azan ho ya jaras

rasta ek aur jata hai salasil ki taraf

jaise be-harf-o-nawa utri hai ilhami kitab

wo muKHatab hain usi andaz se dil ki taraf

baada-KHwaron mein bhi hum 'kawish' wali ban kar jiye

ruKH hamara tha tasawwuf ke masail ki taraf