tir mizhgan ke to abru ki kaman mange hai

tiir mizhgāñ ke to abrū kī kamāñ māñge hai

dil vo aafat hai ki har āfat-e-jāñ māñge hai

kaisā mushkil mirā ġham tarz-e-bayāñ māñge hai

lab pe ban jaa.e jo naġhma vo fuġhāñ māñge hai

terī ḳhātir unheñ dī ḳhunkī-e-shabnam varna

merā har sher to sho.ale kī zabāñ māñge hai

zulm se dab nahīñ saktā mirā azm-e-bebāk

kahīñ faulād bhī patthar se amaañ māñge hai

log bāzār meñ hairat se mujhe dekhe haiñ

sirf ik merā hī dil hai jo ziyāñ māñge hai

ye hamīñ haiñ ki bahar-hāl jiye jaate haiñ

un kā maarā huā paanī na yahāñ māñge hai

zehn-o-dil pusht-e-ḳhamīda haiñ yahāñ yāroñ ke

aur mirā husn-e-suḳhan fahm-e-javāñ māñge hai

tir mizhgan ke to abru ki kaman mange hai

dil wo aafat hai ki har aafat-e-jaan mange hai

kaisa mushkil mera gham tarz-e-bayan mange hai

lab pe ban jae jo naghma wo fughan mange hai

teri KHatir unhen di KHunki-e-shabnam warna

mera har sher to shoale ki zaban mange hai

zulm se dab nahin sakta mera azm-e-bebak

kahin faulad bhi patthar se aman mange hai

log bazar mein hairat se mujhe dekhe hain

sirf ek mera hi dil hai jo ziyan mange hai

ye hamin hain ki bahar-haal jiye jate hain

un ka mara hua pani na yahan mange hai

zehn-o-dil pusht-e-KHamida hain yahan yaron ke

aur mera husn-e-suKHan fahm-e-jawan mange hai