tir-o-kaman ke sath na tegh-o-tabar ke sath

tīr-o-kamāñ ke saath na teġh-o-tabar ke saath

ham jang ḳhālī haath laḌe haiñ jigar ke saath

dil bhī udaas udaas hai dīvār-o-dar ke saath

lipTī haiñ ārzūeñ tirī rah-guzar ke saath

mansūb terī yaad hai dīvār-o-dar ke saath

phir kyoñ na ho lagāv mujhe apne ghar ke saath

bolī koī lagā.e to mehr-o-ḳhulūs kī

ham ḳhud ko bech deñge matā’-e-hunar ke saath

ab dekhiye vo ā.eñge yā maut aa.egī

bāñdhī hai dil ne shart charāġh-e-sahar ke saath

ġhusse se laal ho gayā sūraj ye dekh kar

shabnam ulajh rahī thī nasīm-e-sahar ke saath

mushkil meñ jab paḌoge to ḳhud jaan jāoge

ahbāb pesh aate haiñ kis kis hunar ke saath

sāhil pe dam-ba-ḳhud thī tamāshā.iyoñ kī bhiiḌ

kashtī hamārī khel rahī thī bhañvar ke saath

aage kisī ke haath pasārā nahīñ kabhī

rahte haiñ muflisī meñ bhī ham karr-o-far ke saath

sachchā.ī sāmne nahīñ aatī 'avām ke

hotī hai chheḌ-chhāḌ hamesha ḳhabar ke saath

āsāñ nahīñ hai mā'raka-e-zindagī 'shakīl'

dastār bhī sañbhālnī paḌtī hai sar ke saath

tir-o-kaman ke sath na tegh-o-tabar ke sath

hum jang KHali hath laDe hain jigar ke sath

dil bhi udas udas hai diwar-o-dar ke sath

lipTi hain aarzuen teri rah-guzar ke sath

mansub teri yaad hai diwar-o-dar ke sath

phir kyon na ho lagaw mujhe apne ghar ke sath

boli koi lagae to mehr-o-KHulus ki

hum KHud ko bech denge mata’-e-hunar ke sath

ab dekhiye wo aaenge ya maut aaegi

bandhi hai dil ne shart charagh-e-sahar ke sath

ghusse se lal ho gaya suraj ye dekh kar

shabnam ulajh rahi thi nasim-e-sahar ke sath

mushkil mein jab paDoge to KHud jaan jaoge

ahbab pesh aate hain kis kis hunar ke sath

sahil pe dam-ba-KHud thi tamashaiyon ki bhiD

kashti hamari khel rahi thi bhanwar ke sath

aage kisi ke hath pasara nahin kabhi

rahte hain muflisi mein bhi hum karr-o-far ke sath

sachchai samne nahin aati 'awam ke

hoti hai chheD-chhaD hamesha KHabar ke sath

aasan nahin hai ma'raka-e-zindagi 'shakil'

dastar bhi sanbhaalni paDti hai sar ke sath