tira-baKHti to na badli gardish-e-ayyam se

tīra-baḳhtī to na badlī gardish-e-ayyām se

shaam badlī sub.h se aur sub.h badlī shaam se

tark-e-ulfat kī qasam khā le ġham-e-ayyām se

kaam ye bhī ho nahīñ saktā dil-e-nākām se

kitne armānoñ kā ḳhuuñ thā ye na dekhā ek ne

chand qatre sab ne dekhe jo gire the jaam se

jhilmilā kar bujh ga.e āḳhir ko be-roġhan charāġh

ḳhushk āñkheñ saath kyā detīñ sahar tak shaam se

pārsā.ī kā lahū tak zāhidoñ ne pī liyā

baḌh ke haiñ añgḌā.iyāñ terī chhalakte jaam se

tum kaho dīvāna mujh ko maiñ karūñ takmīl-e-ishq

tum ko matlab naam se hai mujh ko matlab kaam se

sarhad-e-mulk-e-adam par muntazir haiñ suur ke

paañv phailā kar lahad meñ so.eñ kyā ārām se

sub.h-e-ishrat dekhne ko kis sahāre par ji.eñ

ik charāġh ummīd kā thā vo bhī gul hai shaam se

ḳhār-e-ġham chubhte haiñ 'navvāb' aaj jab dil meñ to phir

bistar-e-gul par bhī kyā niiñd aa.egī ārām se

tira-baKHti to na badli gardish-e-ayyam se

sham badli subh se aur subh badli sham se

tark-e-ulfat ki qasam kha le gham-e-ayyam se

kaam ye bhi ho nahin sakta dil-e-nakaam se

kitne armanon ka KHun tha ye na dekha ek ne

chand qatre sab ne dekhe jo gire the jam se

jhilmila kar bujh gae aaKHir ko be-roghan charagh

KHushk aankhen sath kya detin sahar tak sham se

parsai ka lahu tak zahidon ne pi liya

baDh ke hain angDaiyan teri chhalakte jam se

tum kaho diwana mujh ko main karun takmil-e-ishq

tum ko matlab nam se hai mujh ko matlab kaam se

sarhad-e-mulk-e-adam par muntazir hain sur ke

panw phaila kar lahad mein soen kya aaram se

subh-e-ishrat dekhne ko kis sahaare par jien

ek charagh ummid ka tha wo bhi gul hai sham se

KHar-e-gham chubhte hain 'nawwab' aaj jab dil mein to phir

bistar-e-gul par bhi kya nind aaegi aaram se