tirgi mein ek pal ka hi sahaara kar gaya

tīrgī meñ ek pal kā hī sahārā kar gayā

vo charāġhoñ kī tarah shab meñ ujālā kar gayā

justujū ḳhvāhish talab hasrat tamannā aarzū

jaate jaate vo sabhī jazboñ ko ThanDā kar gayā

fāsla kuchh bhī nahīñ thā jism-o-jāñ ke darmiyāñ

vo magar us meñ bhī thoḌā fāsla sā kar gayā

ye bahut achchhā kiyā ki pher lī us ne nazar

kam se kam mere yaqīñ ko aur pakkā kar gayā

abr kā vo ek TukḌā thā bahut chhoTā magar

chilchilātī dhuup meñ kuchh der saaya kar gayā

is qadar dushvāriyoñ kā ye baḌā ehsān hai

hādsoñ kā silsila īmān puḳhta kar gayā

ḳhvāb āñkhoñ ko dikhā kar saare manzar le liye

mujh ko bīnā.ī atā kar ke vo andhā kar gayā

maiñ use ilzām duuñ 'mashkūr' ye mumkin nahīñ

vo mere alfāz le kar mujh ko gūñgā kar gayā

tirgi mein ek pal ka hi sahaara kar gaya

wo charaghon ki tarah shab mein ujala kar gaya

justuju KHwahish talab hasrat tamanna aarzu

jate jate wo sabhi jazbon ko ThanDa kar gaya

fasla kuchh bhi nahin tha jism-o-jaan ke darmiyan

wo magar us mein bhi thoDa fasla sa kar gaya

ye bahut achchha kiya ki pher li us ne nazar

kam se kam mere yaqin ko aur pakka kar gaya

abr ka wo ek TukDa tha bahut chhoTa magar

chilchilati dhup mein kuchh der saya kar gaya

is qadar dushwariyon ka ye baDa ehsan hai

hadson ka silsila iman puKHta kar gaya

KHwab aankhon ko dikha kar sare manzar le liye

mujh ko binai ata kar ke wo andha kar gaya

main use ilzam dun 'mashkur' ye mumkin nahin

wo mere alfaz le kar mujh ko gunga kar gaya