tirgi shoala-e-nafrat ko hawa deti hai

tīrgī sho.ala-e-nafrat ko havā detī hai

raushnī zauq-e-yaqīñ fikr-e-rasā detī hai

tīrgī bā.is-e-āzār musāfir ke liye

raushnī shoḳhī-e-raftār-e-sabā detī hai

tīrgī sarhad-e-auhām se aage na baḌhī

raushnī qarya-e-shab meñ bhī sadā detī hai

tīrgī rang-e-alāmat ke sivā kuchh bhī nahīñ

raushnī aks-e-shafaq rang-e-hinā detī hai

tīrgī jahl ko rakhtī hai dil-o-jāñ kī tarah

raushnī ilm kī rāhoñ kā pata detī hai

muḳhtasar ye ki shab-e-ġham kī sahar hone tak

raushnī nuur kā ik jaal bichhā detī hai

raushnī sūrat-e-paiġhām-e-sahar hai 'aḳhtar'

raushnī hī sila-e-ahd-e-vafā detī hai

tirgi shoala-e-nafrat ko hawa deti hai

raushni zauq-e-yaqin fikr-e-rasa deti hai

tirgi bais-e-azar musafir ke liye

raushni shoKHi-e-raftar-e-saba deti hai

tirgi sarhad-e-auham se aage na baDhi

raushni qarya-e-shab mein bhi sada deti hai

tirgi rang-e-alamat ke siwa kuchh bhi nahin

raushni aks-e-shafaq rang-e-hina deti hai

tirgi jahl ko rakhti hai dil-o-jaan ki tarah

raushni ilm ki rahon ka pata deti hai

muKHtasar ye ki shab-e-gham ki sahar hone tak

raushni nur ka ek jal bichha deti hai

raushni surat-e-paigham-e-sahar hai 'aKHtar'

raushni hi sila-e-ahd-e-wafa deti hai