Tika ke sar mere shane pe so rahi thi wo

Tikā ke sar mire shāne pe so rahī thī vo

jahān-e-ḳhvāb meñ bedār ho rahī thī vo

pahāḌiyoñ ke idhar ratjagoñ kī bastī thī

pahāḌiyoñ ke udhar niiñd bo rahī thī vo

maiñ is liye thā qabīle ke jashn meñ shāmil

ki dushmanoñ kī mohabbat meñ ro rahī thī vo

isī gulāb ke kāñToñ se ḳhvāb laTke the

isī gulāb kī pattī pe so rahī thī vo

mujhe pata nahīñ kyā kyā dikhā.ī us ko diyā

mujhe pata hai magar dekh to rahī thī vo

vo ghaas moḌ ke panchhī banā rahī thī aur

paroñ meñ os ke qatre piro rahī thī vo

nadī meñ tairtī kuchh jugnuoñ kī lāsheñ thiiñ

jab apne jism ke dāġhoñ ko dho rahī thī vo

'mirāsh' terī mohabbat se pahle saarī 'umr

badan se ek thī par man se do rahī thī vo

Tika ke sar mere shane pe so rahi thi wo

jahan-e-KHwab mein bedar ho rahi thi wo

pahaDiyon ke idhar ratjagon ki basti thi

pahaDiyon ke udhar nind bo rahi thi wo

main is liye tha qabile ke jashn mein shamil

ki dushmanon ki mohabbat mein ro rahi thi wo

isi gulab ke kanTon se KHwab laTke the

isi gulab ki patti pe so rahi thi wo

mujhe pata nahin kya kya dikhai us ko diya

mujhe pata hai magar dekh to rahi thi wo

wo ghas moD ke panchhi bana rahi thi aur

paron mein os ke qatre piro rahi thi wo

nadi mein tairti kuchh jugnuon ki lashen thin

jab apne jism ke daghon ko dho rahi thi wo

'mirash' teri mohabbat se pahle sari 'umr

badan se ek thi par man se do rahi thi wo