tilism-e-lab mein kya kuchh hai wo chashm-e-mehrban kya hai

tilism-e-lab meñ kyā kuchh hai vo chashm-e-mehrbāñ kyā hai

abhī se kyā kaheñ zar-ḳhāna-e-dil meñ kahāñ kyā hai

tumhārī kahkashā.eñ kaun sī duniyā kā partav haiñ

yahāñ to chāñd hai bādal hai taare haiñ vahāñ kyā hai

vahāñ bhī kyā sitāre un ke pahlū meñ tarashte haiñ

vahāñ sāz-e-zamāñ kyā hai ram-e-sayyārgāñ kyā hai

abhī vo mai-kada-bar-dosh āñkheñ rū-ba-rū hoñgī

abhī vo hañs ke pūchheñge ki rang-e-mai-kashāñ kyā hai

ye kaisī raushnī miTTī tale karvaT badaltī hai

vo ā.īna to ḳhāKī thā ye aks-e-jāvedāñ kyā hai

vahāñ bhī kyā koī hijr-e-abad-ābād bastā hai

yahāñ to pūchhiye mat sūrat-e-dard-e-nihāñ kyā hai

ye sail-e-hijr tham jaa.e zarā to phir khule shāyad

ki ye rang-e-judā.ī az-karāñ tā-ba-karāñ kyā hai

kisī dariyā kī bāñhoñ ke bulāve aa ga.e varna

hamāre vāste ye vus.at-e-reg-e-ravāñ kyā hai

tilism-e-lab mein kya kuchh hai wo chashm-e-mehrban kya hai

abhi se kya kahen zar-KHana-e-dil mein kahan kya hai

tumhaari kahkashaen kaun si duniya ka partaw hain

yahan to chand hai baadal hai tare hain wahan kya hai

wahan bhi kya sitare un ke pahlu mein tarashte hain

wahan saz-e-zaman kya hai ram-e-sayyargan kya hai

abhi wo mai-kada-bar-dosh aankhen ru-ba-ru hongi

abhi wo hans ke puchhenge ki rang-e-mai-kashan kya hai

ye kaisi raushni miTTi tale karwaT badalti hai

wo aaina to KHaKi tha ye aks-e-jawedan kya hai

wahan bhi kya koi hijr-e-abad-abaad basta hai

yahan to puchhiye mat surat-e-dard-e-nihan kya hai

ye sail-e-hijr tham jae zara to phir khule shayad

ki ye rang-e-judai az-karan ta-ba-karan kya hai

kisi dariya ki banhon ke bulawe aa gae warna

hamare waste ye wusat-e-reg-e-rawan kya hai