tilismi shab mein jab KHwabon ke paikar TuT jate hain

tilismī shab meñ jab ḳhvāboñ ke paikar TuuT jaate haiñ

ka.ī ma.asūm afsāne adhūre chhūT jaate haiñ

ġham-e-daurāñ ne mujh se terī yādeñ aisī chhīnī haiñ

ki jaise bhiiḌ meñ maaoñ se bachche chhūT jaate haiñ

havādis kī fazā meñ azm merā saath de kab tak

tanāvar peḌ bhī āñdhī meñ aksar TuuT jaate haiñ

kitāb-e-zindagī kā har varaq is tarah bikhrā hai

ḳhizāñ meñ jis tarah shāḳhoñ se patte TuuT jaate haiñ

kisī nā-mehrbāñ kī yaad hai yuuñ saf.ha-e-dil par

ki jaise naqsh-e-pā giilī zamīñ par chhūT jaate haiñ

'nasīm' is tarah kuchh bikhrī haiñ ab rishtoñ kī zanjīreñ

ki jaise nanhe bachchoñ se khilaune TuuT jaate haiñ

tilismi shab mein jab KHwabon ke paikar TuT jate hain

kai masum afsane adhure chhuT jate hain

gham-e-dauran ne mujh se teri yaaden aisi chhini hain

ki jaise bhiD mein maon se bachche chhuT jate hain

hawadis ki faza mein azm mera sath de kab tak

tanawar peD bhi aandhi mein aksar TuT jate hain

kitab-e-zindagi ka har waraq is tarah bikhra hai

KHizan mein jis tarah shaKHon se patte TuT jate hain

kisi na-mehrban ki yaad hai yun safha-e-dil par

ki jaise naqsh-e-pa gili zamin par chhuT jate hain

'nasim' is tarah kuchh bikhri hain ab rishton ki zanjiren

ki jaise nanhe bachchon se khilaune TuT jate hain