tera firaq bhi qurbat bhi ek masala hai

tirā firāq bhī qurbat bhī ek mas.ala hai

hamāre saath mohabbat bhī ek mas.ala hai

tumhāre shahr meñ dāḳhil hue to yaad aaya

tumhāre shahr se hijrat bhī ek mas.ala hai

tumhāre shahr meñ aa kar rahe to ham pe khulā

hamārī gaañv se nisbat bhī ek mas.ala hai

hameñ kisī ne batāyā thā haath malte hue

zar-o-zamīn bhī aurat bhī ek mas.ala hai

adam vajūd kī chāhat to mas.ala hai magar

adam vajūd se nafrat bhī ek mas.ala hai

hamāre gaañv kī miTTī meñ ḳhvāb ugte haiñ

hamāre gaañv meñ ġhurbat bhī ek mas.ala hai

ḳhayāl-o-ḳhvāb kī bebākiyoñ ke pesh-e-nazar

ḳhayāl-o-ḳhvāb meñ ḳhalvat bhī ek mas.ala hai

tumheñ hamāre liye vaqt hī nahīñ miltā

hamāre vāste fursat bhī ek mas.ala hai

tera firaq bhi qurbat bhi ek masala hai

hamare sath mohabbat bhi ek masala hai

tumhaare shahr mein daKHil hue to yaad aaya

tumhaare shahr se hijrat bhi ek masala hai

tumhaare shahr mein aa kar rahe to hum pe khula

hamari ganw se nisbat bhi ek masala hai

hamein kisi ne bataya tha hath malte hue

zar-o-zamin bhi aurat bhi ek masala hai

adam wajud ki chahat to masala hai magar

adam wajud se nafrat bhi ek masala hai

hamare ganw ki miTTi mein KHwab ugte hain

hamare ganw mein ghurbat bhi ek masala hai

KHayal-o-KHwab ki bebakiyon ke pesh-e-nazar

KHayal-o-KHwab mein KHalwat bhi ek masala hai

tumhein hamare liye waqt hi nahin milta

hamare waste fursat bhi ek masala hai