tera gham dil pe ifsha kar rahe hain

tirā ġham dil pe ifshā kar rahe haiñ

so dil se kār-e-duniyā kar rahe haiñ

tujhe ab kyā batā.eñ ham tire ba.ad

ba-nām-e-zīst kyā kyā kar rahe haiñ

hazāroñ rañj pai-dar-pai uThā kar

bas ik ġham kā mudāvā kar rahe haiñ

kuchh aisā hai ġham-e-tanhā.ī dar-pesh

ki ik aalam ko apnā kar rahe haiñ

kabhī jo kaam chāhat se kiye the

unhīñ kā aaj sadma kar rahe haiñ

ye zaḳhm-e-dil salāmat ham isī ko

muqaddar kā sitāra kar rahe haiñ

kisī sūrat jo puurī ho na paa.e

ham ik aisī tamannā kar rahe haiñ

jo karnā chāhte the bil-irāda

vo sab kuchh be-irāda kar rahe haiñ

unhī logoñ ko hai duniyā mayassar

ki jo us se kināra kar rahe haiñ

vahī karne kī hasrat jāñ-gusil hai

ki jo karne kā charchā kar rahe haiñ

tera gham dil pe ifsha kar rahe hain

so dil se kar-e-duniya kar rahe hain

tujhe ab kya bataen hum tere baad

ba-nam-e-zist kya kya kar rahe hain

hazaron ranj pai-dar-pai uTha kar

bas ek gham ka mudawa kar rahe hain

kuchh aisa hai gham-e-tanhai dar-pesh

ki ek aalam ko apna kar rahe hain

kabhi jo kaam chahat se kiye the

unhin ka aaj sadma kar rahe hain

ye zaKHm-e-dil salamat hum isi ko

muqaddar ka sitara kar rahe hain

kisi surat jo puri ho na pae

hum ek aisi tamanna kar rahe hain

jo karna chahte the bil-irada

wo sab kuchh be-irada kar rahe hain

unhi logon ko hai duniya mayassar

ki jo us se kinara kar rahe hain

wahi karne ki hasrat jaan-gusil hai

ki jo karne ka charcha kar rahe hain