tera gham hai to ye jazbon ki rau mein bah nahin sakta

tirā ġham hai to ye jazboñ kī rau meñ bah nahīñ saktā

kisī ke haq meñ merā dil ġhalat kuchh kah nahīñ saktā

havā achchhī hai us kī aur na paanī us kā achchhā hai

maiñ is shahr-e-munāfiq meñ to ik din rah nahīñ saktā

ye shahr-e-dil nahīñ bastī hai ye fatvā faroshoñ kī

yahāñ apne ḳhudā ko maiñ ḳhudā bhī kah nahīñ saktā

zamīñ sūraj ke chāroñ-samt gardish ab bhī kartī hai

ye sach hai phir bhī maiñ apnī zabāñ se kah nahīñ saktā

palaT kar ik-na-ik din apnī fitrat par vo aa.egā

vo kaT kar apne mehvar se hamesha rah nahīñ saktā

maiñ insāñ huuñ mirī fitrat zamīnī hai miyāñ-'najmī'

bahut din tak sar-e-bām-e-falak maiñ rah nahīñ saktā

tera gham hai to ye jazbon ki rau mein bah nahin sakta

kisi ke haq mein mera dil ghalat kuchh kah nahin sakta

hawa achchhi hai us ki aur na pani us ka achchha hai

main is shahr-e-munafiq mein to ek din rah nahin sakta

ye shahr-e-dil nahin basti hai ye fatwa faroshon ki

yahan apne KHuda ko main KHuda bhi kah nahin sakta

zamin suraj ke chaaron-samt gardish ab bhi karti hai

ye sach hai phir bhi main apni zaban se kah nahin sakta

palaT kar ik-na-ik din apni fitrat par wo aaega

wo kaT kar apne mehwar se hamesha rah nahin sakta

main insan hun meri fitrat zamini hai miyan-'najmi'

bahut din tak sar-e-baam-e-falak main rah nahin sakta