tera hi nam kafi hai to ghairon ka bayan kyon ho

tirā hī naam kaafī hai to ġhairoñ kā bayāñ kyoñ ho

na.e kirdār se bojhal ye merī dāstāñ kyoñ ho

tire bhī paañv baḌhte haiñ mirī bāheñ bhī phailī haiñ

to phir ye fāsla itnā hamāre darmiyāñ kyoñ ho

agar hai rāhbar sādiq to koī raah dikhlā.e

jo bhaTke dar-ba-dar aise vo mīr-e-kārvāñ kyoñ ho

ho dil meñ ġham magar pur-nam na ho āñkheñ kabhī terī

chhupā hai dil meñ jo dariyā vo āñkhoñ se ravāñ kyoñ ho

zarā bazm-e-suḳhan dekhe mirā meyār-e-fan logo

diyā hai jo ḳhudā ne fan mujhe vo rā.egāñ kyoñ ho

ka.ī kohsār dard-o-ġham ke duniyā meñ uThāne haiñ

to phir ye hijr kī shab ek mujh par sargirāñ kyoñ ho

ye achchhā hai ki soz-e-ishq meñ chup-chāp jal jaa.eñ

faqat tash.hīr kī ḳhātir 'sahāb' itnā dhuāñ kyoñ ho

tera hi nam kafi hai to ghairon ka bayan kyon ho

nae kirdar se bojhal ye meri dastan kyon ho

tere bhi panw baDhte hain meri bahen bhi phaili hain

to phir ye fasla itna hamare darmiyan kyon ho

agar hai rahbar sadiq to koi rah dikhlae

jo bhaTke dar-ba-dar aise wo mir-e-karwan kyon ho

ho dil mein gham magar pur-nam na ho aankhen kabhi teri

chhupa hai dil mein jo dariya wo aankhon se rawan kyon ho

zara bazm-e-suKHan dekhe mera meyar-e-fan logo

diya hai jo KHuda ne fan mujhe wo raegan kyon ho

kai kohsar dard-o-gham ke duniya mein uThane hain

to phir ye hijr ki shab ek mujh par sargiran kyon ho

ye achchha hai ki soz-e-ishq mein chup-chap jal jaen

faqat tashhir ki KHatir 'sahab' itna dhuan kyon ho