tera mizaj ho barham ye kab gawara hai

tirā mizāj ho barham ye kab gavārā hai

yahī ḳhushī hai hamārī ki tū hamārā hai

ye chāñd-rāt ye jugnū ye terī yaad kī lau

is ehtimām-e-mohabbat meñ din guzārā hai

jo be-sabab hī kisī or chal paḌe haiñ ham

to zindagī kā bhalā kis taraf ishāra hai

ye kyā huā hai koī faisla nahīñ hotā

ki mere haath meñ jugnū hai yā sitāra hai

ye kaisī vahshat-e-nāyāb muzmar-e-jāñ hai

haiñ paañv raqs meñ jaltā huā sharāra hai

tapish bahut thī tirī yaad kī magar ham ne

tirī hī yaad se mausam zarā sañvārā hai

maiñ dushmanoñ ko kabhī muaaf kar nahīñ paa.ī

magar ḳhudā kī ḳhudā.ī ne dil nikhārā hai

vo kis kamāl se mujh ko badal rahā hai 'ġhazal'

mohabbatoñ kā yahī ek isti.āra hai

tera mizaj ho barham ye kab gawara hai

yahi KHushi hai hamari ki tu hamara hai

ye chand-raat ye jugnu ye teri yaad ki lau

is ehtimam-e-mohabbat mein din guzara hai

jo be-sabab hi kisi or chal paDe hain hum

to zindagi ka bhala kis taraf ishaara hai

ye kya hua hai koi faisla nahin hota

ki mere hath mein jugnu hai ya sitara hai

ye kaisi wahshat-e-nayab muzmar-e-jaan hai

hain panw raqs mein jalta hua sharara hai

tapish bahut thi teri yaad ki magar hum ne

teri hi yaad se mausam zara sanwara hai

main dushmanon ko kabhi muaf kar nahin pai

magar KHuda ki KHudai ne dil nikhaara hai

wo kis kamal se mujh ko badal raha hai 'ghazal'

mohabbaton ka yahi ek istiara hai