tera raaz fash kar dun na hua kabhi gawara

tirā raaz faash kar duuñ na huā kabhī gavārā

mujhe aql ne bhī shah dī to junūñ ne bhī ubhārā

tirī mehr ke tasadduq tire qahr par bhī qurbāñ

mujhe ye bhī hai gavārā mujhe vo bhī hai gavārā

ye safīna kis kā Duubā ki taḌap rahī haiñ maujeñ

ye patā chalā ki tūfāñ huā aaj be-sahārā

tirī bazm-e-be-ḳhudī meñ na huī kabhī ḳhabar tak

ye sunā to hai kisī ne mujhe duur se pukārā

mirī be-qarāriyoñ kā asar-e-sahar-chakāñ thā

ki laraz laraz ke Duubā shab-e-hijr par sitārā

mirī ujḌī bazm-e-hastī bhī kabhī sañvar sakegī

maiñ azal se sun rahā huuñ ki tumhīñ ho ālam-ārā

vo shabīh-e-nāz us kī jo hai shāhkār-e-fitrat

ye vahī to hai 'musavvir' jo hai ālam-āshkārā

tera raaz fash kar dun na hua kabhi gawara

mujhe aql ne bhi shah di to junun ne bhi ubhaara

teri mehr ke tasadduq tere qahr par bhi qurban

mujhe ye bhi hai gawara mujhe wo bhi hai gawara

ye safina kis ka Duba ki taDap rahi hain maujen

ye pata chala ki tufan hua aaj be-sahaara

teri bazm-e-be-KHudi mein na hui kabhi KHabar tak

ye suna to hai kisi ne mujhe dur se pukara

meri be-qarariyon ka asar-e-sahar-chakan tha

ki laraz laraz ke Duba shab-e-hijr par sitara

meri ujDi bazm-e-hasti bhi kabhi sanwar sakegi

main azal se sun raha hun ki tumhin ho aalam-ara

wo shabih-e-naz us ki jo hai shahkar-e-fitrat

ye wahi to hai 'musawwir' jo hai aalam-ashkara