tera yaqin hun main kab se is guman mein tha

tirā yaqīn huuñ maiñ kab se is gumān meñ thā

maiñ zindagī ke baḌe saḳht imtihān meñ thā

paTak ke toḌ diyā jis pe tesha-e-jāñ ko

maiñ jū-e-shīr sā pinhāñ usī chaTān meñ thā

shajar shajar mirī aamad kā muntazir mausam

maiñ barg-e-gul sā havāoñ kī kis uḌaan meñ thā

andherī raat meñ samt-e-sadā pe chhoḌ diyā

havas kā tiir jo is jism kī kamān meñ thā

uThā sakā na maiñ dast-e-tahī se patthar bhī

matā-e-ġhair sā vo kāñch kī dukān meñ thā

ye daur-e-sang-nazar is ko paḌh nahīñ paayā

sahīfa dil kā mirā jaane kis zabān meñ thā

tera yaqin hun main kab se is guman mein tha

main zindagi ke baDe saKHt imtihan mein tha

paTak ke toD diya jis pe tesha-e-jaan ko

main ju-e-shir sa pinhan usi chaTan mein tha

shajar shajar meri aamad ka muntazir mausam

main barg-e-gul sa hawaon ki kis uDan mein tha

andheri raat mein samt-e-sada pe chhoD diya

hawas ka tir jo is jism ki kaman mein tha

uTha saka na main dast-e-tahi se patthar bhi

mata-e-ghair sa wo kanch ki dukan mein tha

ye daur-e-sang-nazar is ko paDh nahin paya

sahifa dil ka mera jaane kis zaban mein tha