tere ahl-e-dard ke roz-o-shab isi kashmakash mein guzar gae

tire ahl-e-dard ke roz-o-shab isī kashmakash meñ guzar ga.e

kabhī ġham meñ Duub ke rah ga.e kabhī Dūbte hī ubhar ga.e

ye maqām-e-ishq hai kaun sā na shikāyateñ haiñ na shukriya

jo tire sitam pe nisār the vo tire karam se bhī Dar ga.e

sar-e-rāh dair-o-haram kahīñ jo mile bhī hoñ to ajab nahīñ

hameñ kyā ḳhabar tirī justujū meñ kahāñ kahāñ se guzar ga.e

haiñ vafā kī rāh-e-darāz meñ na.ī manzileñ na.e marhale

vo baneñge kyā mire ham-safar jo qadam qadam pe Thahar ga.e

jinheñ nāḳhudā se umiid thī unheñ nāḳhudā ne Dubo diyā

jo ulajh ke rah ga.e mauj se vo kabhī ke paar utar ga.e

jo kabhī sharāb-e-nashāt hai to hai zahr-e-ġham kabhī jaam meñ

hai ye zindagī koī zindagī abhī jī uThe abhī mar ga.e

vo nigāh kaisī nigāh thī ki 'shamīm' se vo na chhup sake

ye adā bhī qābil-e-dīd hai jo mile to bach ke guzar ga.e

tere ahl-e-dard ke roz-o-shab isi kashmakash mein guzar gae

kabhi gham mein Dub ke rah gae kabhi Dubte hi ubhar gae

ye maqam-e-ishq hai kaun sa na shikayaten hain na shukriya

jo tere sitam pe nisar the wo tere karam se bhi Dar gae

sar-e-rah dair-o-haram kahin jo mile bhi hon to ajab nahin

hamein kya KHabar teri justuju mein kahan kahan se guzar gae

hain wafa ki rah-e-daraaz mein nai manzilen nae marhale

wo banenge kya mere ham-safar jo qadam qadam pe Thahar gae

jinhen naKHuda se umid thi unhen naKHuda ne Dubo diya

jo ulajh ke rah gae mauj se wo kabhi ke par utar gae

jo kabhi sharab-e-nashat hai to hai zahr-e-gham kabhi jam mein

hai ye zindagi koi zindagi abhi ji uThe abhi mar gae

wo nigah kaisi nigah thi ki 'shamim' se wo na chhup sake

ye ada bhi qabil-e-did hai jo mile to bach ke guzar gae