tere badan ko hawa chhu ke jab bhi aati hai

tire badan ko havā chhū ke jab bhī aatī hai

ġhazal kā koī hasīñ sher gungunātī hai

zamīñ tarāna-e-dozaḳh abhī bhī gaatī hai

na.ī sadī hai ki shahnā.iyāñ bajātī hai

ye aur mere irādoñ ko puḳhta kar degī

jo barq mere nasheman pe dandanātī hai

bujhe charāġh jalānā to mo.ajiza Thahrā

ye dekhiye ki havā kis tarah bujhātī hai

idhar bhī sāñpoñ kī zad par hayāt hai larzāñ

udhar fazā kī ghuTan un kā dil jalātī hai

tirā surāġh na apnā pata na ilm-e-nujūm

na maut aa.ī na kambaḳht niiñd aatī hai

fasād barpā kiyā kis ne phir samundar meñ

bhaḌak ke mauj hare jañgaloñ ko khātī hai

hai 'sarfarāz' taqāzā-e-vaqt bhī ma.alūm

pe vo ravish jo hasīnoñ kā dil lubhātī hai

tere badan ko hawa chhu ke jab bhi aati hai

ghazal ka koi hasin sher gungunati hai

zamin tarana-e-dozaKH abhi bhi gati hai

nai sadi hai ki shahnaiyan bajati hai

ye aur mere iradon ko puKHta kar degi

jo barq mere nasheman pe dandanati hai

bujhe charagh jalana to moajiza Thahra

ye dekhiye ki hawa kis tarah bujhati hai

idhar bhi sanpon ki zad par hayat hai larzan

udhar faza ki ghuTan un ka dil jalati hai

tera suragh na apna pata na ilm-e-nujum

na maut aai na kambaKHt nind aati hai

fasad barpa kiya kis ne phir samundar mein

bhaDak ke mauj hare jangalon ko khati hai

hai 'sarfaraaz' taqaza-e-waqt bhi malum

pe wo rawish jo hasinon ka dil lubhati hai