tere baghair sukun-o-qarar ko tarse

tire baġhair sukūn-o-qarār ko tarse

bahār meñ bhī ham apnī bahār ko tarse

milā na chain kisī kal unheñ bhī taḌpā kar

qarār chhīn ke vo bhī qarār ko tarse

vo sāmne the magar chashm-e-shauq uTh na sakī

dam-e-visāl bhī dīdār-e-yār ko tarse

tamām zindagī guzrī thī aish se jin kī

vo bād-e-marg charāġh-e-mazār ko tarse

bas ik nazar unheñ dekhā to ye sazā paa.ī

ki umr bhar ke liye ham qarār ko tarse

kiyā na vasl kā va.ada bhī us sitamgar ne

tamām umr shab-e-intizār ko tarse

kuchh aisī be-ḳhudī chhā.ī thī ġham kī ai 'sāhir'

ki ham sharāb bhī pī kar ḳhumār ko tarse

tere baghair sukun-o-qarar ko tarse

bahaar mein bhi hum apni bahaar ko tarse

mila na chain kisi kal unhen bhi taDpa kar

qarar chhin ke wo bhi qarar ko tarse

wo samne the magar chashm-e-shauq uTh na saki

dam-e-visal bhi didar-e-yar ko tarse

tamam zindagi guzri thi aish se jin ki

wo baad-e-marg charagh-e-mazar ko tarse

bas ek nazar unhen dekha to ye saza pai

ki umr bhar ke liye hum qarar ko tarse

kiya na wasl ka wada bhi us sitamgar ne

tamam umr shab-e-intizar ko tarse

kuchh aisi be-KHudi chhai thi gham ki ai 'sahir'

ki hum sharab bhi pi kar KHumar ko tarse