tere banae ko bar-e-digar banate hue

tire banā.e ko bār-e-digar banāte hue

maiñ thak gayā huuñ darīchoñ ko dar banāte hue

tujhe ḳhabar nahīñ guzre kis imtihān se ham

tirī shabīh tujhe dekh kar banāte hue

pas-e-hayāt dikhāte ho ik na.ī duniyā

lagegī der idhar ko udhar banāte hue

kabhī zamīn pe kitnī zamīn hotī thī

vo sochtā hai samundar meñ ghar banāte hue

ai dar-e-ḳhām zarā dekh kaisī pathrā.ī

mirī nigāh tujhe beshtar banāte hue

zamīn chiir ga.ī āsmāñ pe haavī huī

ye merī aañkh nazar ko nazar banāte hue

mukālme meñ zabāñ laḌkhaḌāne lagtī hai

pa-e-daroġh agar ko magar banāte hue

ḳhudā ke but pe ye qasdan nahīñ mirā chehra

bahak gayā thā zarā haath sar banāte hue

vo naqsh-gar thā parindoñ kā aur phir ik din

havā nashīn huā bāl-o-par banāte hue

tere banae ko bar-e-digar banate hue

main thak gaya hun darichon ko dar banate hue

tujhe KHabar nahin guzre kis imtihan se hum

teri shabih tujhe dekh kar banate hue

pas-e-hayat dikhate ho ek nai duniya

lagegi der idhar ko udhar banate hue

kabhi zamin pe kitni zamin hoti thi

wo sochta hai samundar mein ghar banate hue

ai dar-e-KHam zara dekh kaisi pathrai

meri nigah tujhe beshtar banate hue

zamin chir gai aasman pe hawi hui

ye meri aankh nazar ko nazar banate hue

mukalme mein zaban laDkhaDane lagti hai

pa-e-darogh agar ko magar banate hue

KHuda ke but pe ye qasdan nahin mera chehra

bahak gaya tha zara hath sar banate hue

wo naqsh-gar tha parindon ka aur phir ek din

hawa nashin hua baal-o-par banate hue