tere gawah ne kaisa bayan rakkha hai

tire gavāh ne kaisā bayān rakkhā hai

kahā hai jhuuT magar sach kā dhyān rakkhā hai

pata lagāo ki vo ḳhud ko kyā samajhtā hai

jahān-bhar ne ḳhudā jis ko maan rakkhā hai

na jaane kab kisī ke vāste dhḌaknā ho

so dil ne ḳhud ko abhī tak javān rakkhā hai

zabāñ pe aatī huī dil kī baat se Dar kar

kisī ne muñh meñ achānak se paan rakkhā hai

ḳhudā ke paas izāfī thā fāsla jitnā

vo us ne tere mire darmiyān rakkhā hai

jo kāTtā hai use dī zabān lambī sī

jo kaT rahā hai use be-zabān rakkhā hai

sunoge baat to tum sab kī dhyān se 'shekhar'

karoge tum vahī jo tum ne Thaan rakkhā hai

tere gawah ne kaisa bayan rakkha hai

kaha hai jhuT magar sach ka dhyan rakkha hai

pata lagao ki wo KHud ko kya samajhta hai

jahan-bhar ne KHuda jis ko man rakkha hai

na jaane kab kisi ke waste dhDakna ho

so dil ne KHud ko abhi tak jawan rakkha hai

zaban pe aati hui dil ki baat se Dar kar

kisi ne munh mein achanak se pan rakkha hai

KHuda ke pas izafi tha fasla jitna

wo us ne tere mere darmiyan rakkha hai

jo kaTta hai use di zaban lambi si

jo kaT raha hai use be-zaban rakkha hai

sunoge baat to tum sab ki dhyan se 'shekhar'

karoge tum wahi jo tum ne Than rakkha hai