tere huzur jo do-chaar din guzar aaya

tire huzūr jo do-chār din guzār aayā

vo faiz-yāb huā āqibat sañvār aayā

nasīb vaale haiñ va.ade vafā hue jin ke

hamāre naam jo aayā to intizār aayā

chalā to chaltā gayā ik junūn manzil meñ

agarche rāsta pur-sañg-o-ḳhār-dār aayā

maiñ aaj aayā huuñ ḳhaas aap ke bulāve par

agarche bazm meñ pahle bhī baar baar aayā

mirā chaman rahā sadiyoñ se amn kā mehvar

ye kaun aayā ki har samt intishār aayā

hamāre ghar hī na aayā to phir balā se mirī

hazār baar agar mausam-e-bahār aayā

chhuḌā ke haath gayā 'nazr'-e-gul ke mausam meñ

kalī ko ThanD lagī pūchhne ko ḳhaar aayā

tere huzur jo do-chaar din guzar aaya

wo faiz-yab hua aaqibat sanwar aaya

nasib wale hain wade wafa hue jin ke

hamare nam jo aaya to intizar aaya

chala to chalta gaya ek junun manzil mein

agarche rasta pur-sang-o-KHar-dar aaya

main aaj aaya hun KHas aap ke bulawe par

agarche bazm mein pahle bhi bar bar aaya

mera chaman raha sadiyon se amn ka mehwar

ye kaun aaya ki har samt intishaar aaya

hamare ghar hi na aaya to phir bala se meri

hazar bar agar mausam-e-bahaar aaya

chhuDa ke hath gaya 'nazr'-e-gul ke mausam mein

kali ko ThanD lagi puchhne ko KHar aaya