tere ishaara-e-abru ka ehtiram karen

tire ishāra-e-abrū kā ehtirām kareñ

vajūd apnā sambhāleñ ki terā kaam kareñ

javāb de to mazā bhī mile savāloñ kā

vo aa.ina hai to phir kis tarah kalām kareñ

thakan se aañkh jhapakne lagī hai sonā hai

tujhe junūn-e-safar āḳhirī salām kareñ

bahut se kaam haiñ duniyā meñ aadmī ke liye

kisī ke vāste kyuuñ zindagī harām kareñ

ibādatoñ ke maze ḳhaas log hī lūTeñ

rivāj-e-shirk-e-mohabbat jahāñ meñ aam kareñ

ḳhatā ke hote zamān-o-makāñ kī qaid ġhalat

na.ī fazā na.ī duniyā kā intizām kareñ

laveñ charāġhoñ kī āñkhoñ meñ gum huiiñ shāyad

kahīñ se raushnī laa.eñ to fikr-e-shām kareñ

jidhar bhī jā.iye shorish-zada ilāqa hai

kahīñ bhī jā-e-amāñ hai jahāñ qayām kareñ

tamām qatra-e-shabnam hoñ qumqume jaise

nashāt rañg savere kā ehtirām kareñ

bujhe charāġhoñ meñ kaise ho nuur kī tarsīl

na ho ye fikr to phir intizār-e-shām kareñ

har aadmī ko yahāñ da.avā-e-ḳhudā.ī hai

akelī jaan hai kis kis kā ehtirām kareñ

tumheñ hai sar kī zarūrat hameñ shahādat kī

tum apnā kaam sambhālo ham apnā kaam kareñ

na fan-shanās hai koī na sher-fahm koī

kise kalām sunā.eñ kahāñ kalām kareñ

tumhārā ġham bhī hai ai 'ramz' apne ġham jaisā

matā.a-e-mushtarka ye ġhazal ke naam kareñ

tere ishaara-e-abru ka ehtiram karen

wajud apna sambhaalen ki tera kaam karen

jawab de to maza bhi mile sawalon ka

wo aaina hai to phir kis tarah kalam karen

thakan se aankh jhapakne lagi hai sona hai

tujhe junun-e-safar aaKHiri salam karen

bahut se kaam hain duniya mein aadmi ke liye

kisi ke waste kyun zindagi haram karen

ibaadaton ke maze KHas log hi luTen

riwaj-e-shirk-e-mohabbat jahan mein aam karen

KHata ke hote zaman-o-makan ki qaid ghalat

nai faza nai duniya ka intizam karen

lawen charaghon ki aankhon mein gum huin shayad

kahin se raushni laen to fikr-e-sham karen

jidhar bhi jaiye shorish-zada ilaqa hai

kahin bhi ja-e-aman hai jahan qayam karen

tamam qatra-e-shabnam hon qumqume jaise

nashat rang sawere ka ehtiram karen

bujhe charaghon mein kaise ho nur ki tarsil

na ho ye fikr to phir intizar-e-sham karen

har aadmi ko yahan dawa-e-KHudai hai

akeli jaan hai kis kis ka ehtiram karen

tumhein hai sar ki zarurat hamein shahadat ki

tum apna kaam sambhaalo hum apna kaam karen

na fan-shanas hai koi na sher-fahm koi

kise kalam sunaen kahan kalam karen

tumhaara gham bhi hai ai 'ramz' apne gham jaisa

mataa-e-mushtarka ye ghazal ke nam karen