tere jab rang rangte hain to phir hum raqs karte hain

tire jab rang rañgte haiñ to phir ham raqs karte haiñ

mujassam tujh meñ Dhalte haiñ to phir ham raqs karte haiñ

chhanā chhan-chhan chhanā chhan-chhan ye ghuñghrū se jo man āñgan

tirī yādoñ ke bajte haiñ to phir ham raqs karte haiñ

azīz-e-jāñ tire ġham meñ sitāre jo shab-e-hijrāñ

sar-e-mizhgāñ chamakte haiñ to phir ham raqs karte haiñ

kisī Dhaltī huī shab meñ junūñ vahshat diyā aur maiñ

badan se jab nikalte haiñ to phir ham raqs karte haiñ

bahut chup-chāp sahte haiñ aziyyat ham judā.ī kī

magar had se guzarte haiñ to phir ham raqs karte haiñ

mohabbat ke qabīloñ se nikal kar ye junūñ-zāde

ḳhirad se jab ulajhte haiñ to phir ham raqs karte haiñ

nigāheñ kab uThāte haiñ tirī mahfil meñ ham lekin

jo mahfil se nikalte haiñ to phir ham raqs karte haiñ

ġhubār-e-rāh ban kar jo tire dīvāne ham pāgal

tujhe chhū kar guzarte haiñ to phir ham raqs karte haiñ

sar-e-dasht-e-talab hasrat tirī aur bebasī merī

kabhī bāham jo milte haiñ to phir ham raqs karte haiñ

ye bulle-shah batāte haiñ na maane yaar jab 'jīnā'

tabhī ghuñghrū pahante haiñ to phir ham raqs karte haiñ

tere jab rang rangte hain to phir hum raqs karte hain

mujassam tujh mein Dhalte hain to phir hum raqs karte hain

chhana chhan-chhan chhana chhan-chhan ye ghunghru se jo man aangan

teri yaadon ke bajte hain to phir hum raqs karte hain

aziz-e-jaan tere gham mein sitare jo shab-e-hijran

sar-e-mizhgan chamakte hain to phir hum raqs karte hain

kisi Dhalti hui shab mein junun wahshat diya aur main

badan se jab nikalte hain to phir hum raqs karte hain

bahut chup-chap sahte hain aziyyat hum judai ki

magar had se guzarte hain to phir hum raqs karte hain

mohabbat ke qabilon se nikal kar ye junun-zade

KHirad se jab ulajhte hain to phir hum raqs karte hain

nigahen kab uThate hain teri mahfil mein hum lekin

jo mahfil se nikalte hain to phir hum raqs karte hain

ghubar-e-rah ban kar jo tere diwane hum pagal

tujhe chhu kar guzarte hain to phir hum raqs karte hain

sar-e-dasht-e-talab hasrat teri aur bebasi meri

kabhi baham jo milte hain to phir hum raqs karte hain

ye bulle-shah batate hain na mane yar jab 'jina'

tabhi ghunghru pahante hain to phir hum raqs karte hain