tere jahan se alag ek jahan chahta hun

tire jahāñ se alag ik jahān chāhtā huuñ

na.ī zamīn nayā āsmān chāhtā huuñ

badan kī qaid se bāhar to jā nahīñ saktā

isī hisār meñ rah kar uḌaan chāhtā huuñ

ḳhamosh rahne pe ab dam sā ghuTne lagtā hai

mire ḳhudā maiñ dahan meñ zabān chāhtā huuñ

koī shajar hī sahī dhuup se najāt to ho

ye tum se kis ne kahā sā.ebān chāhtā huuñ

ye TukḌā TukḌā zamīneñ na kar atā mujh ko

maiñ puure sahn kā puurā makān chāhtā huuñ

phir ek baar mirī ahmiyat ko lauTā de

tirī nigāh ko phir mehrbān chāhtā huuñ

mirī talab koī dushvār-kun nahīñ 'āzar'

isī zamīn pe hifz-o-amān chāhtā huuñ

tere jahan se alag ek jahan chahta hun

nai zamin naya aasman chahta hun

badan ki qaid se bahar to ja nahin sakta

isi hisar mein rah kar uDan chahta hun

KHamosh rahne pe ab dam sa ghuTne lagta hai

mere KHuda main dahan mein zaban chahta hun

koi shajar hi sahi dhup se najat to ho

ye tum se kis ne kaha saeban chahta hun

ye TukDa TukDa zaminen na kar ata mujh ko

main pure sahn ka pura makan chahta hun

phir ek bar meri ahmiyat ko lauTa de

teri nigah ko phir mehrban chahta hun

meri talab koi dushwar-kun nahin 'azar'

isi zamin pe hifz-o-aman chahta hun