tere karam ko teri be-ruKHi ko dekha hai

tire karam ko tirī be-ruḳhī ko dekhā hai

milī hai maut kabhī zindagī ko dekhā hai

vo jis meñ duub ke rah jaa.e chaḌhtā sūraj bhī

rah-e-hayāt meñ us tīrgī ko dekhā hai

sivā.e ruuh kī ik tishnagī ke kuchh na milā

bahut qarīb se jab zindagī ko dekhā hai

na jaane kitne diye bujh ga.e haiñ tab jā kar

na.ī sahar ko na.ī raushnī ko dekhā hai

kabhī kisī kī vafāoñ pe shak nahīñ kartā

vo shaḳhs jis ne mirī bebasī ko dekhā hai

ye dair hai vo haram is se kyā ġharaz mujh ko

har ek ruup meñ maiñ ne usī ko dekhā hai

kabhī kisī kī bhī bechārgī pe mat hañsiye

ye vo maqām hai jis par sabhī ko dekhā hai

ham āshnā haiñ nazākat se vaqt kī 'gulshan'

ki ham ne chaḌhtī utartī nadī ko dekhā hai

tere karam ko teri be-ruKHi ko dekha hai

mili hai maut kabhi zindagi ko dekha hai

wo jis mein dub ke rah jae chaDhta suraj bhi

rah-e-hayat mein us tirgi ko dekha hai

siwae ruh ki ek tishnagi ke kuchh na mila

bahut qarib se jab zindagi ko dekha hai

na jaane kitne diye bujh gae hain tab ja kar

nai sahar ko nai raushni ko dekha hai

kabhi kisi ki wafaon pe shak nahin karta

wo shaKHs jis ne meri bebasi ko dekha hai

ye dair hai wo haram is se kya gharaz mujh ko

har ek rup mein main ne usi ko dekha hai

kabhi kisi ki bhi bechaargi pe mat hansiye

ye wo maqam hai jis par sabhi ko dekha hai

hum aashna hain nazakat se waqt ki 'gulshan'

ki hum ne chaDhti utarti nadi ko dekha hai