tere KHayal ka shoala thama thama sa tha

tire ḳhayāl kā sho.ala thamā thamā sā thā

tamām shahr-e-tamannā bujhā bujhā sā thā

na jaane mausam-e-talvār kis tarah guzrā

mire lahū kā shajar to jhukā jhukā sā thā

hameñ bhī niiñd ne thapkī dī so ga.e tum bhī

tamām hādsa-e-shab sunā sunā sā thā

balā-e-shām ke saa.e the aur vādi-e-dil

agarche sub.h kā chehra dhulā dhulā sā thā

charāg manzil-e-dil par jalā ke kyā karte

vafā kā qāfila kab se rukā rukā sā thā

vo naam jis ke liye zindagī gañvā.ī ga.ī

na jaane kyā thā magar kuchh bhalā bhalā sā thā

tere KHayal ka shoala thama thama sa tha

tamam shahr-e-tamanna bujha bujha sa tha

na jaane mausam-e-talwar kis tarah guzra

mere lahu ka shajar to jhuka jhuka sa tha

hamein bhi nind ne thapki di so gae tum bhi

tamam hadsa-e-shab suna suna sa tha

bala-e-sham ke sae the aur wadi-e-dil

agarche subh ka chehra dhula dhula sa tha

charag manzil-e-dil par jala ke kya karte

wafa ka qafila kab se ruka ruka sa tha

wo nam jis ke liye zindagi ganwai gai

na jaane kya tha magar kuchh bhala bhala sa tha