tere KHayal ke phulon se rang-o-bu nikle

tire ḳhayāl ke phūloñ se rang-o-bū nikle

jo tū nahīñ hai to phir terī aarzū nikle

kahīñ to ḳhatm kahānī ho rā.egānī kī

kahīñ to pyaas ke sahrā meñ aabjū nikle

ye ishq jins-e-girāñ-qadr hai kuchh aisā hī

samā.e sar meñ ye saudā to aabrū nikle

ajiib hai ye tajassus tirā ki jī chāhe

tū mil bhī jaa.e to terī na justujū nikle

to kyā ajab hai tirā ism raat paḌhte hue

charāġh tez havāoñ ke rū-ba-rū nikle

rahā na hosh kabhī apne haal kā jin ko

tire ḳhayāl kī galiyoñ meñ bā-vazū nikle

paḌe jo umr kī gadrā.ī sā.atoñ meñ kahīñ

vo aks shīsha-e-dil se na phir kabhū nikle

ye hijr-zād havā.eñ kareñ jo bain kabhī

to phir charāġh kī āñkhoñ se bhī lahū nikle

mazā to jab hai ki ik dūsre kī chāhat meñ

makāñ se niklūñ maiñ aur lā-makāñ se tū nikle

hamī ne daar ko chūmā thā naam par us ke

ye ham hī the jo mohabbat meñ surḳh-rū nikle

kuchh aise ruuh meñ apnī tū raqs kar 'jīnā'

bajeñ jo saañs ke ghuñghrū to sirf hū nikle

tere KHayal ke phulon se rang-o-bu nikle

jo tu nahin hai to phir teri aarzu nikle

kahin to KHatm kahani ho raegani ki

kahin to pyas ke sahra mein aabju nikle

ye ishq jins-e-giran-qadr hai kuchh aisa hi

samae sar mein ye sauda to aabru nikle

ajib hai ye tajassus tera ki ji chahe

tu mil bhi jae to teri na justuju nikle

to kya ajab hai tera ism raat paDhte hue

charagh tez hawaon ke ru-ba-ru nikle

raha na hosh kabhi apne haal ka jin ko

tere KHayal ki galiyon mein ba-wazu nikle

paDe jo umr ki gadrai saaton mein kahin

wo aks shisha-e-dil se na phir kabhu nikle

ye hijr-zad hawaen karen jo bain kabhi

to phir charagh ki aankhon se bhi lahu nikle

maza to jab hai ki ek dusre ki chahat mein

makan se niklun main aur la-makan se tu nikle

hami ne dar ko chuma tha nam par us ke

ye hum hi the jo mohabbat mein surKH-ru nikle

kuchh aise ruh mein apni tu raqs kar 'jina'

bajen jo sans ke ghunghru to sirf hu nikle