tere shikwon se jaur-e-asman tak baat aa pahunchi

tire shikvoñ se jaur-e-āsmāñ tak baat aa pahuñchī

kahāñ se ibtidā kī thī kahāñ tak baat aa pahuñchī

mohabbat meñ hamāre imtihāñ tak baat aa pahuñchī

jahāñ rukne lage dam bhī vahāñ tak baat aa pahuñchī

chaman meñ aag lagne kā bhī sadma kam na thā mujh ko

taḌap ai dil ki ab to āshiyāñ tak baat aa pahuñchī

huā āġhāz qatre se magar ye bahs bil-āḳhir

baḌhī itnī ki bahr-e-be-karāñ tak baat aa pahuñchī

ḳhudā jaane mirī tauba kā ab anjām kyā hogā

janāb-e-shaiḳh se pīr-e-muġhāñ tak baat aa pahuñchī

kujā vo din ki ganj-e-be-bahā samjhā mohabbat ko

kujā ye din ki jins-e-rā.egāñ tak baat aa pahuñchī

yaqīñ thā ham ko raaz ifshā adū hī ne kiyā hogā

bahut nādim hue jab rāz-dāñ tak baat aa pahuñchī

na maiñ ab dil kī suntā huuñ na dil ab merī suntā hai

tumhārī mehrbānī se yahāñ tak baat aa pahuñchī

nahīñ bhī muñh se kahnā jin ko 'sāhir' baar hotā hai

ġhazab hogā kabhī jo un kī haañ tak baat aa pahuñchī

tere shikwon se jaur-e-asman tak baat aa pahunchi

kahan se ibtida ki thi kahan tak baat aa pahunchi

mohabbat mein hamare imtihan tak baat aa pahunchi

jahan rukne lage dam bhi wahan tak baat aa pahunchi

chaman mein aag lagne ka bhi sadma kam na tha mujh ko

taDap ai dil ki ab to aashiyan tak baat aa pahunchi

hua aaghaz qatre se magar ye bahs bil-aKHir

baDhi itni ki bahr-e-be-karan tak baat aa pahunchi

KHuda jaane meri tauba ka ab anjam kya hoga

janab-e-shaiKH se pir-e-mughan tak baat aa pahunchi

kuja wo din ki ganj-e-be-baha samjha mohabbat ko

kuja ye din ki jins-e-raegan tak baat aa pahunchi

yaqin tha hum ko raaz ifsha adu hi ne kiya hoga

bahut nadim hue jab raaz-dan tak baat aa pahunchi

na main ab dil ki sunta hun na dil ab meri sunta hai

tumhaari mehrbani se yahan tak baat aa pahunchi

nahin bhi munh se kahna jin ko 'sahir' bar hota hai

ghazab hoga kabhi jo un ki han tak baat aa pahunchi