teri aamad ne sach har KHwab-e-derina bana Dala

tirī aamad ne sach har ḳhvāb-e-derīna banā Daalā

hamārī anjuman ko bazm-e-ḳhāsāna banā Daalā

añdheroñ se nikal kar raushnī meñ paañv rakhte hī

dikhā kar aañkh tum ne mujh ko begāna banā Daalā

bahut chālāk hai is daur kā majnūñ jo chupke se

sunā hai us ne sahrā meñ hī kāshāna banā Daalā

kiyā jab 'ahd tum se rāz-dārī kā to phir maiñ ne

zabāñ kar lī muqaffal dil ko tah-ḳhāna banā Daalā

hukūmat ne kiyā jab mai-kade kā band darvāza

to rindoñ ne hasīñ āñkhoñ ko mai-ḳhāna banā Daalā

shikasta dil kā kyā karte so ik tarkīb ye sūjhī

har ik TukḌe se maiñ ne ek ā.īna banā Daalā

mujhe kahne lage sab log dīvāna to zāhir hai

zamāne-bhar ko maiñ ne 'nazr' dīvāna banā Daalā

teri aamad ne sach har KHwab-e-derina bana Dala

hamari anjuman ko bazm-e-KHasana bana Dala

andheron se nikal kar raushni mein panw rakhte hi

dikha kar aankh tum ne mujh ko begana bana Dala

bahut chaalak hai is daur ka majnun jo chupke se

suna hai us ne sahra mein hi kashana bana Dala

kiya jab 'ahd tum se raaz-dari ka to phir main ne

zaban kar li muqaffal dil ko tah-KHana bana Dala

hukumat ne kiya jab mai-kade ka band darwaza

to rindon ne hasin aankhon ko mai-KHana bana Dala

shikasta dil ka kya karte so ek tarkib ye sujhi

har ek TukDe se main ne ek aaina bana Dala

mujhe kahne lage sab log diwana to zahir hai

zamane-bhar ko main ne 'nazr' diwana bana Dala