teri aankhen tera husn-e-jawan tahrir karte hain

tirī āñkheñ tirā husn-e-javāñ tahrīr karte haiñ

zamīñ kī pastiyoñ meñ āsmāñ tahrīr karte haiñ

koī mausam ḳhizāñ se āshnā us ko nahīñ kartā

ham apne ḳhuun se jo gulsitāñ tahrīr karte haiñ

zamāne kī koī karvaT use sañvlā nahīñ saktī

ham apnī aañch se jo kahkashāñ tahrīr karte haiñ

koī dīvār us kā rāsta kyā rok saktī hai

havā kī lauh par apnā bayāñ tahrīr karte haiñ

guzarte vaqt ko āb-e-ravāñ kā naam dete haiñ

farāġhat ko nashāt-e-be-karāñ tahrīr karte haiñ

ḳhayāl-o-ḳhvāb ko alfāz meñ Dhālā nahīñ jaatā

jo karnā chāhte haiñ vo kahāñ tahrīr karte haiñ

zamāne ko vo apnī dāstāñ ma.alūm hotī hai

haqīqat meñ ham apnī dāstāñ tahrīr karte haiñ

teri aankhen tera husn-e-jawan tahrir karte hain

zamin ki pastiyon mein aasman tahrir karte hain

koi mausam KHizan se aashna us ko nahin karta

hum apne KHun se jo gulsitan tahrir karte hain

zamane ki koi karwaT use sanwla nahin sakti

hum apni aanch se jo kahkashan tahrir karte hain

koi diwar us ka rasta kya rok sakti hai

hawa ki lauh par apna bayan tahrir karte hain

guzarte waqt ko aab-e-rawan ka nam dete hain

faraghat ko nashat-e-be-karan tahrir karte hain

KHayal-o-KHwab ko alfaz mein Dhaala nahin jata

jo karna chahte hain wo kahan tahrir karte hain

zamane ko wo apni dastan malum hoti hai

haqiqat mein hum apni dastan tahrir karte hain