teri gali mein koi ham-zaban nahin milta

tirī galī meñ koī ham-zabāñ nahīñ miltā

makāñ to haiñ koī ahl-e-makāñ nahīñ miltā

karūñ maiñ kaise bhalā e'tibār logoñ kā

yahāñ kisī kā bhī chehra 'ayāñ nahīñ miltā

agarche 'aish ke sāmān saare haiñ maujūd

magar koī bhī hameñ shādmāñ nahīñ miltā

kabhī jo 'aam thā logoñ kī tishnagī ke liye

hamāre gaañv meñ ab vo kuaañ nahīñ miltā

jo apnī manzil-e-maqsūd se nahīñ vāqif

use fareb-e-tamannā kahāñ nahīñ miltā

kahūñ na tum se to maiñ hāl-e-dil kahūñ kis se

sivā tumhāre koī rāz-dāñ nahīñ miltā

hai nasl-e-nau ke liye fikr lāzmī 'rahbar'

dil-o-nazar kā koī naujavāñ nahīñ miltā

teri gali mein koi ham-zaban nahin milta

makan to hain koi ahl-e-makan nahin milta

karun main kaise bhala e'tibar logon ka

yahan kisi ka bhi chehra 'ayan nahin milta

agarche 'aish ke saman sare hain maujud

magar koi bhi hamein shadman nahin milta

kabhi jo 'am tha logon ki tishnagi ke liye

hamare ganw mein ab wo kuan nahin milta

jo apni manzil-e-maqsud se nahin waqif

use fareb-e-tamanna kahan nahin milta

kahun na tum se to main haal-e-dil kahun kis se

siwa tumhaare koi raaz-dan nahin milta

hai nasl-e-nau ke liye fikr lazmi 'rahbar'

dil-o-nazar ka koi naujawan nahin milta