teri hansi mein rang bhar rahi thi main

tirī hañsī meñ rang bhar rahī thī maiñ

ki chāñdnī ko paint kar rahī thī maiñ

badan kī lau meñ dasht-e-shab ubuur kar

vo kah rahā thā aur kar rahī thī maiñ

phir us ke baad se ye dil hai daaġh daaġh

bas ek raat chāñd par rahī thī maiñ

tire jamāl se udhar ḳhalā na thā

tire jamāl se udhar rahī thī maiñ

mire tavāf meñ thī saarī kā.ināt

ki jab tirā tavāf kar rahī thī maiñ

mujhe tarāshtā thā raat din koī

kisī ke vāste sañvar rahī thī maiñ

tirī talab nasha thā ek umr kā

utar rahā thā jab to mar rahī thī maiñ

tirā firāq jaise itr-e-vasl thā

aur us ke nam meñ tar-ba-tar rahī thī maiñ

ajiib marhala thā kashf-e-zāt kā

maiñ raushnī thī aur bikhar rahī thī maiñ

teri hansi mein rang bhar rahi thi main

ki chandni ko paint kar rahi thi main

badan ki lau mein dasht-e-shab ubur kar

wo kah raha tha aur kar rahi thi main

phir us ke baad se ye dil hai dagh dagh

bas ek raat chand par rahi thi main

tere jamal se udhar KHala na tha

tere jamal se udhar rahi thi main

mere tawaf mein thi sari kainat

ki jab tera tawaf kar rahi thi main

mujhe tarashta tha raat din koi

kisi ke waste sanwar rahi thi main

teri talab nasha tha ek umr ka

utar raha tha jab to mar rahi thi main

tera firaq jaise itr-e-wasl tha

aur us ke nam mein tar-ba-tar rahi thi main

ajib marhala tha kashf-e-zat ka

main raushni thi aur bikhar rahi thi main