teri in mad-bhari aankhon se baDh kar jam kya hoga

tirī in mad-bharī āñkhoñ se baḌh kar jaam kyā hogā

koī mujh se baḌā duniyā meñ ab ḳhayyām kyā hogā

hasīñ lab chhū le gar paanī mai-e-kausar vo ho jaa.e

ḳhudārā mahñgī is pyālī kā socho daam kyā hogā

havā maddhyam ghane bādal munāsib hai ghanī bārish

nahā.eñ 'ishq kī bārish meñ phir anjām kyā hogā

sitāre toḌ lā.ūñ aur chaman gulzār kar duuñ maiñ

hasīnoñ ke liye is se baḌā in'ām kyā hogā

zamāne ko badalne kī lo ham ne Thaan lī hai ab

mile jab tak na manzil paañv ko ārām kyā hogā

maiñ ḳhud apne gunāhoñ kī ḳhudī taftīsh kartā huuñ

du'ā.eñ maañ kī hoñ jis par koī ilzām kyā hogā

agar guzrūñ chaman se to nigahbānī kareñ āñkheñ

koī shā'ir yahāñ par 'dīp' sā badnām kyā hogā

teri in mad-bhari aankhon se baDh kar jam kya hoga

koi mujh se baDa duniya mein ab KHayyam kya hoga

hasin lab chhu le gar pani mai-e-kausar wo ho jae

KHudara mahngi is pyali ka socho dam kya hoga

hawa maddhyam ghane baadal munasib hai ghani barish

nahaen 'ishq ki barish mein phir anjam kya hoga

sitare toD laun aur chaman gulzar kar dun main

hasinon ke liye is se baDa in'am kya hoga

zamane ko badalne ki lo hum ne Than li hai ab

mile jab tak na manzil panw ko aaram kya hoga

main KHud apne gunahon ki KHudi taftish karta hun

du'aen man ki hon jis par koi ilzam kya hoga

agar guzrun chaman se to nigahbani karen aankhen

koi sha'ir yahan par 'dip' sa badnam kya hoga