teri jalwa-gah se uTh ke hum na idhar gae na udhar gae

tirī jalva-gāh se uTh ke ham na idhar ga.e na udhar ga.e

vahīñ dair bhī thā vahīñ haram na idhar ga.e na udhar ga.e

hameñ aaj aap ke ishq ne vo maqām-e-ḳhās atā kiyā

hue be-niyāz-e-nishāt-o-ġham na idhar ga.e na udhar ga.e

ye fanā baqā kī navāzisheñ ye hayāt-o-maut kī pursisheñ

tire dard-e-hijr kā hai karam na idhar ga.e na udhar ga.e

na qarīn-e-lutf-o-karam hue na rahīn-e-jaur-o-sitam hue

jo the ahl-e-dil vo tirī qasam na idhar ga.e na udhar ga.e

hameñ nāz-e-ishq ne dī sadā kabhī iltifāt pukār uThā

jo vafā-shanās the har qadam na idhar ga.e na udhar ga.e

vo fusūn-e-manzil-e-āgahī vo sukūt-e-mahfil-e-be-ḳhudī

chale darmiyān se bach ke ham na idhar ga.e na udhar ga.e

udhar un ke ruḳh se naqāb uThā idhar apnā hosh-e-nazar gayā

vo pukārte rahe dam-ba-dam na idhar ga.e na udhar ga.e

hai 'kamāl' bāda-kashī kā ye ki ḳhayāl-e-chashm jo aa gayā

hue aise be-ḳhud-o-mast ham na idhar ga.e na udhar ga.e

teri jalwa-gah se uTh ke hum na idhar gae na udhar gae

wahin dair bhi tha wahin haram na idhar gae na udhar gae

hamein aaj aap ke ishq ne wo maqam-e-KHas ata kiya

hue be-niyaz-e-nishat-o-gham na idhar gae na udhar gae

ye fana baqa ki nawazishen ye hayat-o-maut ki pursishen

tere dard-e-hijr ka hai karam na idhar gae na udhar gae

na qarin-e-lutf-o-karam hue na rahin-e-jaur-o-sitam hue

jo the ahl-e-dil wo teri qasam na idhar gae na udhar gae

hamein naz-e-ishq ne di sada kabhi iltifat pukar uTha

jo wafa-shanas the har qadam na idhar gae na udhar gae

wo fusun-e-manzil-e-agahi wo sukut-e-mahfil-e-be-KHudi

chale darmiyan se bach ke hum na idhar gae na udhar gae

udhar un ke ruKH se naqab uTha idhar apna hosh-e-nazar gaya

wo pukarte rahe dam-ba-dam na idhar gae na udhar gae

hai 'kamal' baada-kashi ka ye ki KHayal-e-chashm jo aa gaya

hue aise be-KHud-o-mast hum na idhar gae na udhar gae