teri mahfil mein dasht-e-be-aman le kar nahin aaya

tirī mahfil meñ dasht-e-be-amāñ le kar nahīñ aaya

maiñ apne gahre sannāTe yahāñ le kar nahīñ aaya

mujhe ma.alūm thā raste meñ ghar paḌtā hai sūraj kā

magar phir bhī maiñ sar par sā.ebāñ le kar nahīñ aaya

na jaane kitnī sadiyoñ tak rahe kitnī zabānoñ par

zamīñ par maiñ adhūrī dāstāñ le kar nahīñ aaya

vahīñ par chhoḌ aaya huuñ tirī pahchān kā lamha

tire ghar se tirī parchhā.iyāñ le kar nahīñ aaya

mujhe do-gaz zamīñ hāsil nahīñ bistar bichhāne ko

use shikva ki maiñ kyoñ āsmāñ le kar nahīñ aaya

vahī ūñche shajar saaya nahīñ dete mujhe 'anjum'

maiñ jin kī aas par kaun-o-makāñ le kar nahīñ aaya

teri mahfil mein dasht-e-be-aman le kar nahin aaya

main apne gahre sannaTe yahan le kar nahin aaya

mujhe malum tha raste mein ghar paDta hai suraj ka

magar phir bhi main sar par saeban le kar nahin aaya

na jaane kitni sadiyon tak rahe kitni zabanon par

zamin par main adhuri dastan le kar nahin aaya

wahin par chhoD aaya hun teri pahchan ka lamha

tere ghar se teri parchhaiyan le kar nahin aaya

mujhe do-gaz zamin hasil nahin bistar bichhane ko

use shikwa ki main kyon aasman le kar nahin aaya

wahi unche shajar saya nahin dete mujhe 'anjum'

main jin ki aas par kaun-o-makan le kar nahin aaya