teri mahfil mein teri hi mohabbat khinch lai hai

tirī mahfil meñ terī hī mohabbat khīñch laa.ī hai

mirā zauq-e-nazar terā hī shauq-e-ḳhud-numā.ī hai

tajallī se kabhī dil kī tasallī ho nahīñ saktī

kahāñ ye aañkh mānūs-e-hijābāt-e-ziyā.ī hai

mohabbat se har ik shai meñ hue āsār-e-shai paidā

mohabbat kī ḳhudā.ī hai mohabbat hī ḳhudā.ī hai

ḳhudā yaad aa rahā hai husn-e-īmāñ-soz-e-sāqī se

kamāl-e-pārsā.ī aaj tark-e-pārsā.ī hai

bahāreñ farsh ho ho kar bichhī jaatī haiñ gulshan meñ

'urūs-e-subh-gul ho kar javānī muskurā.ī hai

'zahīn' is dahr meñ hai madd-o-jazr-e-zindagi is se

mohabbat sāz-e-dil par jin suroñ se gungunā.ī hai

teri mahfil mein teri hi mohabbat khinch lai hai

mera zauq-e-nazar tera hi shauq-e-KHud-numai hai

tajalli se kabhi dil ki tasalli ho nahin sakti

kahan ye aankh manus-e-hijabaat-e-ziyai hai

mohabbat se har ek shai mein hue aasar-e-shai paida

mohabbat ki KHudai hai mohabbat hi KHudai hai

KHuda yaad aa raha hai husn-e-iman-soz-e-saqi se

kamal-e-parsai aaj tark-e-parsai hai

bahaaren farsh ho ho kar bichhi jati hain gulshan mein

'urus-e-subh-gul ho kar jawani muskurai hai

'zahin' is dahr mein hai madd-o-jazr-e-zindagi is se

mohabbat saz-e-dil par jin suron se gungunai hai