teri nazar mein jo ye aab-o-tab baqi hai

tirī nazar meñ jo ye āb-o-tāb baaqī hai

zarūr koī to ḳhāna-ḳharāb baaqī hai

abhī azaan ke hone meñ der hai logo

abhī to jaam meñ thoḌī sharāb baaqī hai

ye zindagī kā navishta ajal ke haath aaya

gunāh ḳhatm hue ab azaab baaqī hai

lahū meñ koī harārat nahīñ rahī un ke

zabāñ pe na.ara-e-sad-inqalāb baaqī hai

abhī se aap ne kyoñ uñgliyāñ jalā Dālīñ

abhī to ḳhūn-e-jigar kā hisāb baaqī hai

ye maqbara hai bas alfāz aur ma.ānī kā

kitāb-ḳhvāñ to nahīñ hai kitāb baaqī hai

abhī to chāñd bhī baaqī hai us kī duniyā bhī

ye kaun kahtā hai bas āftāb baaqī hai

nazar har ek kī be-parda ho ga.ī jaise

diloñ meñ aaj bhī lekin hijāb baaqī hai

na tishnagī kā mudāvā use samajh 'paikar'

tirī nazar meñ jo dasht-e-sarāb baaqī hai

teri nazar mein jo ye aab-o-tab baqi hai

zarur koi to KHana-KHarab baqi hai

abhi azan ke hone mein der hai logo

abhi to jam mein thoDi sharab baqi hai

ye zindagi ka nawishta ajal ke hath aaya

gunah KHatm hue ab azab baqi hai

lahu mein koi hararat nahin rahi un ke

zaban pe nara-e-sad-inqalab baqi hai

abhi se aap ne kyon ungliyan jala Dalin

abhi to KHun-e-jigar ka hisab baqi hai

ye maqbara hai bas alfaz aur maani ka

kitab-KHwan to nahin hai kitab baqi hai

abhi to chand bhi baqi hai us ki duniya bhi

ye kaun kahta hai bas aaftab baqi hai

nazar har ek ki be-parda ho gai jaise

dilon mein aaj bhi lekin hijab baqi hai

na tishnagi ka mudawa use samajh 'paikar'

teri nazar mein jo dasht-e-sarab baqi hai