teri nazar sabab-e-tishnagi na ban jae

tirī nazar sabab-e-tishnagī na ban jaa.e

kahīñ sharāb mirī zindagī na ban jaa.e

kabhī kabhī to añdherā bhī ḳhūb-sūrat hai

tirā ḳhayāl kahīñ raushnī na ban jaa.e

bhaḌak na jaa.e kahīñ sham-e-ilm-o-dānish bhī

junūñ junūñ hī rahe āgahī na ban jaa.e

maiñ Dar rahā huuñ kahāñ terā sāmnā hogā

tirā vajūd hī merī kamī na ban jaa.e

tire baġhair zamāne ko muñh dikhā na sakūñ

ye zindagī kahīñ sharmindagī na ban jaa.e

jahāñ meñ hai ki kamīñ-gāh meñ ḳhudā jaane

ab is qadar bhī subuk aadmī na ban jaa.e

ye vahm dil ko satātā hai rū-ba-rū tere

ye terī diid kahīñ āḳhirī na ban jaa.e

tarab kī bazm meñ kam kam fasurdagī ai 'shāz'

kahīñ mizāj kī uftād hī na ban jaa.e

teri nazar sabab-e-tishnagi na ban jae

kahin sharab meri zindagi na ban jae

kabhi kabhi to andhera bhi KHub-surat hai

tera KHayal kahin raushni na ban jae

bhaDak na jae kahin sham-e-ilm-o-danish bhi

junun junun hi rahe aagahi na ban jae

main Dar raha hun kahan tera samna hoga

tera wajud hi meri kami na ban jae

tere baghair zamane ko munh dikha na sakun

ye zindagi kahin sharmindagi na ban jae

jahan mein hai ki kamin-gah mein KHuda jaane

ab is qadar bhi subuk aadmi na ban jae

ye wahm dil ko satata hai ru-ba-ru tere

ye teri did kahin aaKHiri na ban jae

tarab ki bazm mein kam kam fasurdagi ai 'shaz'

kahin mizaj ki uftad hi na ban jae