teri nigah ke qabil nahin to kuchh bhi nahin

tirī nigāh ke qābil nahīñ to kuchh bhī nahīñ

ye dil ḳhudā kī qasam dil nahīñ to kuchh bhī nahīñ

ye dard-e-dāġh ye āh-o-fuġhāñ ye soz-o-gudāz

sivā.e hasrat-e-hāsil nahīñ to kuchh bhī nahīñ

vo girya-e-saharī ho ki āh-e-nīm-shabī

harīf-e-matlab-e-mushkil nahīñ to kuchh bhī nahīñ

tire rukū-o-sujūd aur tire qiyām-o-qu.ūd

huzūr-e-qalb ke hāmil nahīñ to kuchh bhī nahīñ

ye iztirāb ye zauq-e-yaqīñ ye shauq-e-amal

dalīl-e-zindagī-e-dil nahīñ to kuchh bhī nahīñ

taġhayyurāt-e-musalsal havādis-e-paiham

tamām umr kā hāsil nahīñ to kuchh bhī nahīñ

ye jabr-o-qadr-e-mashiyyat ye quvvat-e-fitrat

ba-qadr-e-hausla-e-dil nahīñ to kuchh bhī nahīñ

ye ārzū-e-musalsal ye justujū-e-mudām

nishān-e-jazba-e-manzil nahīñ to kuchh bhī nahīñ

jise zabān-e-mohabbat meñ tuur kahte haiñ

vo dil agar tirī manzil nahīñ to kuchh bhī nahīñ

tire baġhair to firdaus bhī jahannum hai

bahisht agar tirī mahfil nahīñ to kuchh bhī nahīñ

tajalliyāt-e-mohabbat meñ Duub kar 'anvar'

ze-farq-tā-ba-qadam dil nahīñ to kuchh bhī nahīñ

teri nigah ke qabil nahin to kuchh bhi nahin

ye dil KHuda ki qasam dil nahin to kuchh bhi nahin

ye dard-e-dagh ye aah-o-fughan ye soz-o-gudaz

siwae hasrat-e-hasil nahin to kuchh bhi nahin

wo girya-e-sahari ho ki aah-e-nim-shabi

harif-e-matlab-e-mushkil nahin to kuchh bhi nahin

tere ruku-o-sujud aur tere qiyam-o-quud

huzur-e-qalb ke hamil nahin to kuchh bhi nahin

ye iztirab ye zauq-e-yaqin ye shauq-e-amal

dalil-e-zindagi-e-dil nahin to kuchh bhi nahin

taghayyuraat-e-musalsal hawadis-e-paiham

tamam umr ka hasil nahin to kuchh bhi nahin

ye jabr-o-qadr-e-mashiyyat ye quwwat-e-fitrat

ba-qadr-e-hausla-e-dil nahin to kuchh bhi nahin

ye aarzu-e-musalsal ye justuju-e-mudam

nishan-e-jazba-e-manzil nahin to kuchh bhi nahin

jise zaban-e-mohabbat mein tur kahte hain

wo dil agar teri manzil nahin to kuchh bhi nahin

tere baghair to firdaus bhi jahannum hai

bahisht agar teri mahfil nahin to kuchh bhi nahin

tajalliyat-e-mohabbat mein Dub kar 'anwar'

ze-farq-ta-ba-qadam dil nahin to kuchh bhi nahin