teri nigah mein ek shakl de raha hai mujhe

tirī nigāh meñ ik shakl de rahā hai mujhe

mirā hī aks mirī naql de rahā hai mujhe

maiñ ek tīsrī duniyā meñ mubtalā huuñ kahīñ

tū do-jahāñ kī kahāñ aql de rahā hai mujhe

maiñ ik ḳhayāl ke sahrā kī pyaas huuñ jaise

koī sarāb tirī shakl de rahā hai mujhe

zamīn-e-dil pe muqaddar ne hijr boyā thā

jo ġham kī roz na.ī fasl de rahā hai mujhe

tire ḳhayāl pas-e-rūh le ga.e mujh ko

ye jism phir bhī vahāñ daḳhl de rahā hai mujhe

guzar hī jā.egī har shai yahī haqīqat hai

vo ye dalīl pas-e-qatl de rahā hai mujhe

ye 'arsh' zulm hai tanhā.ī ke musāfir par

ye chāñd ḳhvāb-e-shab-e-vasl de rahā hai mujhe

teri nigah mein ek shakl de raha hai mujhe

mera hi aks meri naql de raha hai mujhe

main ek tisri duniya mein mubtala hun kahin

tu do-jahan ki kahan aql de raha hai mujhe

main ek KHayal ke sahra ki pyas hun jaise

koi sarab teri shakl de raha hai mujhe

zamin-e-dil pe muqaddar ne hijr boya tha

jo gham ki roz nai fasl de raha hai mujhe

tere KHayal pas-e-ruh le gae mujh ko

ye jism phir bhi wahan daKHl de raha hai mujhe

guzar hi jaegi har shai yahi haqiqat hai

wo ye dalil pas-e-qatl de raha hai mujhe

ye 'arsh' zulm hai tanhai ke musafir par

ye chand KHwab-e-shab-e-wasl de raha hai mujhe