teri shikast ka elan to nahin karenge

tirī shikast kā e'lān to nahīñ kareñge

jo terā kaam hai darbān to nahīñ kareñge

siyāh-rāt ke āñgan meñ kuud kar ham log

diye jalā.eñge nuqsān to nahīñ kareñge

maiñ apnī zaat kī hairat-sarā se guzrā huuñ

ye tajrabe mujhe hairān to nahīñ kareñge

ye Thiik hai ki zarūrī hai kār-e-girya bhī

magar ye hijr ke daurān to nahīñ kareñge

ye sochnā thā tumheñ dā.ere banāte hue

ye pech tum ko pareshān to nahīñ kareñge

'zahīr' us kī ragoñ ko lahū pilā kar ham

zamīn par koī ehsān to nahīñ kareñge

teri shikast ka e'lan to nahin karenge

jo tera kaam hai darban to nahin karenge

siyah-raat ke aangan mein kud kar hum log

diye jalaenge nuqsan to nahin karenge

main apni zat ki hairat-sara se guzra hun

ye tajrabe mujhe hairan to nahin karenge

ye Thik hai ki zaruri hai kar-e-girya bhi

magar ye hijr ke dauran to nahin karenge

ye sochna tha tumhein daere banate hue

ye pech tum ko pareshan to nahin karenge

'zahir' us ki ragon ko lahu pila kar hum

zamin par koi ehsan to nahin karenge